CEBU, Philippines - Naduso na ngadto sa Provincial Prosecutor’s Office sa dakbayan sa Sugbo kagahapon sa buntag ang kasong murder batok sa usa ka uyoan nga miunay og patay ug mikaon sa atay sa iyang pag-umangkon sa milabay’ng adlaw sa lungsod sa Tabuelan.
Si Efren Matedios, 29, miunay sa pagpatay sa iyang pag-umangkon nga si Lara May Concoles pinaagi sa paglaslas sa tiyan niini ug gihabwa ang ginhawaan dayon gikaon ang atay. Si Fiscal Petrolio Elesterio giduso dayon sa maong kaso ngadto sa korte sa dakbayan sa Toledo human si Matedios mi-wave sa iyang katungod sa pagduso og counter-affidavit.
Human maduso ang kaso si Matedios gibalik kini og dala sa mga polis ngadto sa Tabuelan Police Station diin siya karon gidetiner.
Niadtong Lunes sa hapon ang maong apohan ug ang apo gitanggong sa suspetsado diha sulod sa balay ug gihulgang pangdunggabon kung mogawas.
Ug nianang pagkagabii ang suspetsado miingon sa biktima nga adto kaniya pataparon og katulog apan ang apohan sa bata mibalibad tungod kay atoa kaniya ang mosketiro hinungdan nga ang suspetsado nasuko ug giyatak-yatakan ang iyang inahan ug gitigbas apan nakadagan ug ang bata nga nahibilin maoy giatubang na usab niini og giatake.
Ang tanod nga si Adonis Montuerto kinsa miluwat og affidavit mibutyag nga nakita niya ang suspetsado nga mikaon sa atay sa bata nga gisulod sa plato ug gisuwaan pa kini og asin.
Ang piskaliya nagtinguha nga mapadala ngadto sa usa ka mental institution ang suspetsado aron masuta ang kahimtang sa pangisip niini.
Ang pamilya usab ni Matedios mihangyo nga ipahiling usab ang suspetsado aron masuta kung duna ba kini deperensiya sa pangisip ug matambalan. (BANAT NEWS)