Joavan gidakop pag-usab

CEBU, Philippines - Gidakop na usab sa kapolisan ang kontrobersyal nga sinagop ni Talisay City Mayor Socrates Fernandez nga si Joavan Fernandez kagahapon sa alas-12 sa udto diha sa ‘Balay Alampo-an’ sa Vista Grande sa barangay Tabunok siyudad sa Talisay.

Si Joavan gidakop sa grupo ni Chief Insp. George Ylanan, hepe sa Investigation and Detective Management Branch (IDMB) sa Cebu City Police Office (CCPO) pinasikad sa warrant of arrest nga giisyu ni Judge Enriquita Belarmino sa Regional Trial Court Branch 57 tungod sa kalapasan sa Section 11, sa Article II sa Republic Act RA 9165.

Wala hinuon mosupak ug malinawon nga mikuyog sa Cebu City Police Office si Joavan.

 Ang korte mimandu kang Joavan nga mopiyansa’g P200 mil alang sa iyang temporaryong kagawasan. Matud ni Ylanan ang pagdakop kang Joavan may labot kini sa 20 ka gagmay’ng paketeng gituohang shabu nga ilang nakuha niadtong bulan sa Disyembre sulod sa sakyanan ni Joavan diha sa barangay Carreta sa dihang gialarma kini sa kapulisan.

Giingong si Joavan gikan sa lungsod sa Compostela nga nangompra og shabu paingon dinhi sa dakbayan sa Sugbu.

Apan sa dihang gisuwayan unta og sikop sa kapulisan si Joavan gibanggaan hinuon niini ang sakyanan sa mga polis.

Si Joavan sa iyang bahin nga gikuhaan og reaksyon sa mga tigbalita nagdumili paghatag og pamahayag kay gibawalan siya sa iyang abogado apan matud niya mopiyansa kagahapon sa hapon.

Kini maoy katapusang WOA nga giatubang ni Joavan Fernandez dinhi sa dakbayan sa Sugbu.

Si Joavan daw nasagmuyo nga wala siya lung-i sa kapolisan.

 “Parehas ato nahitabo pagka Biyernes, dili to tinuod, kun tinuod pato nga nanion ko duna unta sila’y makuha nako nga armas ang kapulisan. Klaro kaayong butang-butang tong ilaha nako,” matud pa niini.

Sa laing bahin, si Ylanan gipasakaan usab og reklamo sa duha ka mga Amerkanong sila si Michael Lopez ug Andre Breeding diha sa Visayas Ombudsman tungod sa gihulagway nilang pagpangabuso niini sa gahom ug misang-at og kasong kidnapping ug illegal detention.

Ang maong mga langyaw mipasangil nga gidakop sila ni Ylanan uban sa mga sakop tungod sa giingong reklamo sa usa ka minor nga ilang gimolestiya.

Ang kaso sa duha na-dismiss tungod sa wala na pagtunga sa reklamante diha sa korte. Si Ylanan sa iyang bahin mipadayag sa kaandam pag-atubang sa maong kaso tungod kay nagsunod lang sila sa balaod. (BANAT NEWS)