Gwen nanawag sa bombero

CEBU, Philippines - Giangkon ni Gobernador Gwendolyn Garcia nga siya maoy nangunay sa pagtawag sa mga   bombero dihang miulbo ang dakong sunog sa dakbayan sa Mandaue niadtong adlaw nga Domingo.

Matud pa ni Garcia nga dihang gitawagan siya sa usa sa mga opisyal sa siyudad sa Mandaue ug nagpakitabang sa pagpawong sa sunog, iyang personal nga gitawagan ang kabomberohan sa siyudad sa Sugbo, Consolacion, Lilion,ug Chinese Fire Brigade aron tabangan ang kabomberohan sa Mandaue.

Kini tungod kay dili na mapiog sa kabomberohan sa siyudad sa Mandaue ang dakong kayo nga miulbo sa maong siyudad.

Sigon pa sa gobernadora nga ang sunog sa Mandaue maoy magsilbing indikasyon nga ang  Mandaue city angay’ng mosalmot sa Metro Cebu Development Coordinating Board ( MCDCB) aron dali kining matabangan sa mga kasikbit nga mga siyudad ug kalungsoran kun adunay mahitabo sa maong lugar.

Samtang gipahibawo usab sa gobernadora nga kaniadto pang Domingo niya gitunol ang iyang pasiunang hinabang sa mga nabiktima sa sunog sa Mandaue nga naglakip sa bugas, sardinas, noodles, banig, habol ug uban pa nga maoy sagad niyang ihatag pinaagi sa Provincial Social Welfare Development Office ngadto sa mga biktima sa kalamidad.

Iyang gitataw nga giandam na niya usab ang paghatag og dugang hinabang financial sa higayon nga makahatag na kaniya og kompletong record ang city social welfare office sa siyudad sa Mandaue. (BANATNEWS)