Dispatser giluba angol sa tanod

CEBU, Philippines -  Kritikal ang kahimtang sa usa ka dispatser kinsa giliog pagdunggab sa usa ka gikaaway niining kanhi barangay tanod sa sitio Kagudoy, barangay Basak sa dakbayan sa Lapulapu sa miaging gabii.

Ang biktima mao si Ruel Ompad, 18, samtang ang suspetsadong nakadunggab mao si Eduard Baguio, 42 , minyo, kanhi barangay tanod sa barangay Basak ug silingan sa biktima.

Si PO2 John Carlo Jocotan sa homicide section sa kapolisan sa maong dakbayan miingon nga nagkaon pa sa iyang panihapon ang biktima dihang kalit lang mitungha ang suspetsado. Tungod kay daan nang nagdumot, pagkakita sa suspetsado sa nanihapong biktima, gilanit niini ang iyang kutsilyo ug gihansakan dayon ang liog sa biktima.

Ang biktima kinsa wala makatiwas sa panihapon, gihatod dayon sa iyang mga silingan ngadto sa Lapulapu City District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.

Dugang pa ni PO2 Jocotan nga ang suspetsado kinsa mitahan sa iyang kaugalingon ngadto kanila kasamtangang gibalhog sa ilang detention cell sa Basak Police Station sa Basak, Mandaue City.(WC)(BANATNEWS)