CEBU, Philippines - Ang mga stall sa bag-ong merkado sa barangay Lagtang, dakbayan sa Talisay ihatag lang ngadto sa mga interesadong mga vendor sa daang merkado publiko sa barangay Tabunok, matud ni City Administrator Richel Bacaltos.
Si Bacaltos nga nahinabi sa Banat News nagkanayon nga kagahapon gikatakda nilang ipadala ang final notice ngadto sa mga vendor sa merkado sa Tabunok aron mosumiter sa mga papeles sama sa business permit ug clearance gikan sa treasurer’s office sa pagmatuod nga dili sila gahiang mobayad sa ilang obligasyon matag tuig.
Matud ni Bacaltos nga niadtong Mayo 16, 2011 ang unang deadline sa pagsubmitir sa mga rekisitos apan wala kini tagda sa mga vendor.
Miingon siya nga kutob nalang sa Mayo 28, 2011 ang deadline ug kadtong dili motunol sa ilang mga papeles isipon sila nga walay gusto busa pangitaon sa gobyerno kadtong ubang tawo nga may gustong maninda sa bag-ong merkado aron maoy paukopahon sa mga stall niini.
Kagahapon sa buntag ang mga vendor sa merkado sa Tabunok nag-rally na usab sa atubangan sa city hall kay wala silay gusto nga mobalhin sa merkado sa Lagtang.
Sa laing bahin, ang tulo ka oposisyon nga konsehal sa konseho sa dakbayan sa Talisay nga sila si Konsehal Val Ylanan, Romeo Villarante ug Danny Caballero misuporta sa mga vendor ug migama og position paper sa ilang pagsupak bahin sa pagpabalhin sa mga vendor tungod kay ilang nasuta nga ilegal ang maong kalihukan.
Si Villarante atol sa regular session sa Konseho sa siyudad kagahapon sa buntag mipahigayon og privilege speech diin iyang gipadayag ngadto sa Konseho nga kinahanglang matuman ang rekisitos nga naglangkub sa Paragraph C Section 11 sa Local Government Code of 1991 kalabot sa pagpasiugda og public hearing una ipabalhin ang mga vendor. (BANATNEWS)