Polis mipusil, mikulata sa uyab sikop

CEBU, Philippines - Pulis sa Cebu City Police Office (CCPO) gireklamo nga namusil ug nangulata sa iyang hinigugma sa miaging alas-11 pasado sa gabii diha sa dalan M.J Cuenco Avenue atubangan nga bahin sa National Statistics Office (NSO) sa barangay Tinago siyudad sa Sugbu.

Si Angeline Sibuco, 26, taga Block 74, T. Padilla St., sa barangay T. Padilla ug empleyado sa CCTN-TV Channel 47 nagpa-blotter sa Water- front Police Station human sa hitabo.

Ang gireklamo nga namusil ug nangulata kaniya mao ang iyang hinigugmang si PO2 Aaron Pescadero, 35, taga barangay Tinago ug nadestino sa Operations Branch sa CCPO.

Si PO1 Robert Amascual sa Waterfront Police Station nga nahinabi sa Banat News sa telepono nagkanayon nga si Sibuco mipasangil nga samtang siya nagmaneho sa awto sa maong pulis subay sa dalan M.J Cuenco kalit siyang gisundan niini ug gipusil apan wala kini makaigo kaniya hinungdan nga gibabagan siya niini.

Matud pa sa biktima nga human niini gikulata siya sa pulis ug dili pa igo gikuha niini ang gisul-ob nga helmet ug gihapak sa iyang sampot. Tungod niini gialarma si Pescadero ug gibalhog sa Waterfront Police Station.

Hugot hinuong gipanghimakak sa pulis ang mga alegasyon ni Sibuco. Kagahapon sa hapon gibuhian na si Pescadero human giingong mipirma og affidavit of desistance si Sibuco taliwa’ sa ilang panagsabot atubangan sa ilang mga abogado.

Si SPO1 Edwin Tapero miingon nga nisugot si Sibuco nga iatras ang iyang reklamo batok ni Pescadero maong maglisod usab pagbarog ang kasong administratiba batok kang Pescadero tungod niini. (EIM) (BANATNEWS)