CEBU, Philippines - Dul-an 2 mil ka mga drayber sa traysikol nga sakop sa nagkadaiyang kahugpongan nga ubos sa payong sa Nagkahiusang Drayber sa Sugbo (NADSU) sa pagduso og petisyon ngadto kang Mayor Jonas Cortes batok sa pipila ka mga opisyal sa traffic board sa dakbayan sa Mandaue tungod sa dili maayong pagtagad ngadto kanila.
Si Ruel Tinio nga bise presidente sa Paknaan Mandaue Tricycle Operator and Driver Association (PAKMATODA) nga nahinabi sa Banat News kagahapon namahayag nga ilang petisyonan ang vice chairman sa traffic board sa dakbayan nga si Fiscal Bienvenido Mabanto.
Matud pa niya nga imbes nga maduolan, mangahadlok nalang sila mopadangat sa ilang reklamo ngadto kang Mabanto tungod kay estrikto kini kaayo kun makig-atubang kanila.
“Dili mi makatingog, kay ini’g atubang niya sa amo pulos man kasaba among masinati,” matud pang Tinio.
Si Tinio miingon nga lakip unta sa ilang reklamo mao ang wala na pag-renew sa ilang prangkisa nga giingong fake nga nakapatingala kaayo nila nganong nahimo kining peke nga wala man silay laing gikuhaan niini.
“Ang nakapait pa gyod kay kun madakpan mi ug makabayad mi og multa. Ang among motorsiklo na lang maoy ipadala kay ipabilin man among side car,” reklamo pa niini.
Dugang pa ni Tinio nga nagkalainlaing kahugpongan sa mga traysikol drayber ug operator nga nagbiyahe sa kabarangayan sa Mandaue nga mokabat sa 2,000 ka mga sakop maoy nagkahiusa sa pagduso sa ilang reklamo.
Gipasabot niya nga ang mao nilang kahugpongan dili sakop sa pederasyon sa mga tricycle operator ug tricycle drayber sa dakbayan apan adunay dili nila sakop nga mikuyog usab sa mao nilang kalihokan.
Si Edwin Ermac ang executive director sa Traffic Enforcement Agency of Mandaue (TEAM) nga nahinabi sa DyKC mipadayag nga gihingusgan nila ang pagpatuman sa mga lagda alang sa mga traysikol aron mahapsay ang kadalanan.
Lakip na niini ang higpit nga pagpatuman sa color-coding nga mao karon ang gireklamo sa mga drayber karon. (EIM) (BANATNEWS)