Nakapatay gitabanga'g kulata napusilan

CEBU, Philippines - Talandugon ang kahimtang sa usa ka lalaking gipasanginlang midunggab patay sa usa ka cigarette vendor nga wala mopautang kaniya atol sa kapistahan sa barangay Anonang Sur sa siyudad sa Bogo human kini gitabangan og gukod sa mga tawo ug mga tanod ug napalgang nagbuy-od na ug dunay samad pinusilan sa tiyan.

Ang suspek nga nabiktima usab sa pagpamusil mao si William Catampatan Mumongan, 53, molupyo sa nahisgutang lugar samtang ang biktima nga iyang gidunggab ug namatay mao ang cigarette vendor nga si Rolando Espinosa, 26, taga sitio San Antonio sa barangay Binabag sa samang dakbayan.

Samtang padayon pa ang kapolisan sa pagpangita sa responsableng nakapusil usab sa suspek.

Matud ni PO3 Allan Dosdos, imbestigador sa Bogo City Police Station, dihang nahinabi sa Banat News subay sa imbestigasyon nga si Espinosa nianang pagka-Sabado sa hapon namaligya og sigarilyo ug buot untang utangan sa suspek.

Apan dihang wala mosugot ang biktima mitumaw ang ilang lalis ug misangpot sa pagdunggab sa suspek sa dughan sa biktima.

Daling miikyas ang suspek apan gitabangan kini og gukod sa mga tawo ug mga tanod ug pipila ka minutos ang milabay napalgan na lang kining nagkadugo diha sa kalibonan ug kawayanan nga may samad pinusilan sa dughan.

Si Espinosa gidala sa Verallo District Hospital apan patay na kini. Sa mao gihapong tambalanan gidala si Mumongan apan tungod sa katalandugon sa kahimtang gibalhin kini sa Vicente Sotto Memorial Medical Center (VSMMC) ug gibantayan og mga polis.

Matud ni Dosdos duna na silay lead kun si kinsa ang mipusil kang Mumongan. (BANATNEWS)