Mad nakaiskor apan naeskapohan
CEBU, Philippines - Nakaeskapo ang usa ka gipasanginlang tigpayuhot og ginadiling drugas atol sa buy bust operation sa City Intelligence Branch (CIB) nga sakop sa Multi Agency Anti-Illegal Drugs Task Force (Mad) sa miaging gabii sa sitio Baho sa barangay Calamba, siyudad sa Sugbu.
Apan nakakuha ang kapolisan og mga gidudahang pinaketeng shabu ug nagkalain-laing mga armas ug mga bala gikan sa balay sa suspek nga si Paka Flores kinsa giingong daling nakaikyas.
Segun sa report sa CIB pasado alas-10 sa miaging gabii gihimo ang operasyon ug si SPO1 Raul Cosido Jr., maoy gigamit nga poseur buyer uban sa usa ka informant aron magpakaaron ingnong mopalit og shabu sa kantidad nga P200.
Sa dihang natigayon na ang transaksyon giingong nakabantay si Flores nga mga pulis ang mipalit hinungdan nga midagan sulod sa ilang balay hangtud nga nahitabo ang ginukdanay apan nakaipsot sa luyo sa ilang balay si Flores.
Ang kapulisan nakarekober sulod sa balay sa suspetsado og pito ka gagmay’ng pakete nga gituohang ang sulod shabu, usa ka .357 homemade revolver; usa ka Colt MK IV.45 caliber pistol; usa ka Black Widow .22, caliber 22, usa ka .9 mm Cobra Ingram M1 submachine pistol; duha ka magazine assembly sa .45 kalibreng armas; usa ka magazine sa .9mm Ingram machine pistol; 27 ka nagkalain-laing bala ug usa ka heat sealed nga gituohang shabu.
Si Chief Insp. Romeo Santander, hepe sa CIB nga nahinabi sa mga tigbalita mihulagway kang Flores nga level 2 drug pusher.
Bisan tuod kun nakaikyas si Flores pasakaan gihapon siya sa kapulisan og kalapasan sa Section 5 ug Section 11 sa Article 2 sa Republic Act 9165 ingon man 8294 kon paghupot og armas nga walay lisensya. (BANATNEWS)
- Latest
- Trending
