6-anyos giihaw kay kan-on unta

CEBU, Philippines - Gilapa susama og usa ka baboy ang 6-anyos nga batang babaye nga gitangtangan og ginhawaan ug atay ug gibutang pa sa plato sa iyang kaugalingong uyoan sa bukirang bahin sa barangay Villahermosa, lungsod sa Tabuelan kagahapon sa ala 1:00 sa kaadlawon.

Ang biktima mao si Lara May Concoles, 6, molupyo sa nahisgutang lugar ug pag-umangkon sa suspek nga si Efren Matedios, 29, molupyo sa nahisgutang lugar.

Matud ni Insp. Emmanuel Masong, hepe sa Tabuelan Police dihang nahinabi sa Banat News diriyot usab mapatay sa suspek ang inahan niini nga si Pablita sa wala pa ang pagpatay sa bata.

Matud pang Masong nga si Pablita mitug-an kanila nga nianang gabhiuna mihangyo ang suspek nga itupad ang bata sa iyang higdaanan. Ang maong bata anak sa igsuon sa suspek apan sila na maoy misagop niini.

Apan wala mosugot ang inahan sa suspek nga apohan usab sa biktima hinungdan nga nasuko ang suspek ug mikuha og sundang nga habol ug gitigbas ang inahan sa agtang.

Apan maayo na lang nga wala makadulot ang maong sundang ug nakadagan si Pablita ug nangayo og panabang sa silingang barangay tanod nga distansya ang pinuy-anan.

Tungod niini daling gisusi sa maong tanod kansang pangalan wala pa makuha sa kapolisan ang balay ni Pablita apan nalisang kini sa iyang naabtan nga gilapa sa suspek ang maong bata gamit ang sundang ug gihabwa ang ginhawaan niini.

Wala na maglangay ang tanod ug daling mikaratel og dagan aron mangayo og tabang sa kapolisan.

Atol sa pag-responde sa mga polis nakasibat na ang suspek ug naabtan na lang nila nga patay na ang bata nga may dakong hiwa sa tiyan ug wala nay sulod ang ginhawaan niini.

Usa sa mga molupyo sa maong lugar nga usa ka radio volunteer reporter sa DyDD nga si Cirilo Coli dihang nahinabi sa Banat News mihulagway sa talan-awon sa crime scene nga daw buot kan-on sa suspek ang biktima apan tungod ba kaha sa kabalakang maabtan sa mga tawo gibiyaan na lang niya kini.

Apan matud ni Masong bugtong ang plato lang ug ang atay ug tinae sa biktima ang nakit-an nilang diha sa crime scene.

Sa paghimo ning balita padayon pa ang manhunt operation sa kapulisan sa nakasibat nga suspek ug ang patay’ng lawas sa biktima kasamtangang gihaya sa sports complex ug gitakdang ipaubos sa autopsy pagtino kun wala ba kini among-amongi sa suspek.(EIM) (BANATNEWS)