CEBU, Philippines - Duha ka mga lalaki ang nangaangol sa managlahing dapit dinhi sa dakbayan sa Sugbu kagahapon sa kaadlawon ug niadtong hapon sa adlaw’ng Sabado.
Usa ka Ruben Pacquiao, 22, ang napusilan sa wala mailhing lalaki nga iyang gikasumbagay diha sa usa ka diskohan sa sitio Kabulakan sa barangay Basak ning dakbayan kagahapon sa kaadlawon.
Si PO3 Cristobal Geronimo sa Homicide Section nagkanayon base sa gihimong imbestigasyon sa grupo nila ni SPO2 Rey Cuyos ang biktima miadto sa diskohan uban sa usa ka babayeng ginganlan og Sheila Mae.
Apan sa ilang paglakaw usa ka wala mailhing lalaki ang mibabag ug nangutana kaniya kung uyab ba sa biktima ang maong babaye apan gitubag kini ni Pacquiao og “dili uy, imoha nalang na.”
Tungod niini nasuko ang maong lalaki ug nahitabo ang ilang sinumbagay apan tunga-tunga sa ilang away kalit mibunot og wala matinong kalibre sa armas ang maong lalaki ug gipusil si Pacquiao.
Si Pacquiao pagkaigo sa iyang abaga daling mikaratel og dagan ug nagpatabang ug gidala sa tambalanan samtang ang lalaki wala na igkita.
Sa laing hitabo, naangol ang usa ka 21-anyos nga lalaki human kini dunggaba sa tiyan ug sa likod sa iyang 16-anyos nga igsuon diha sa barangay Calamba niadtong Sabado sa hapon.
Ang biktima kinsa nalandig sa tambalanan base sa imbestigasyon mibadlong sa iyang manghod tungod sa paghukas niini sa iyang gisuot atubangan sa iyang bisita.
Wala kini ikahimuot sa suspek ug misukol sa biktima hinungdan sa nahitabong sinumbagay apan kalit midagan sa kusina ang manghod ug mikuha og kutsilyo dayon gidunggab ang maguwang.
Ang suspek padayon pang gipangita sa kapolisan samtang gitabang ngadto sa Cebu City Medical Center ang biktima. (EIM)(BANAT NEWS)