CEBU, Philippines - Patay nang nahidangat sa tambalanan ang usa ka menor de edad human kini gisulong ug gipusil sa laing batan-on pasado alas-2 sa miaging hapon sa sitio Pulang Yuta sa barangay Looc syudad sa Danao.
Ang biktima nailhan nga si Eugene Albo Palma, 16, molupyo sa maong lugar samtang ang gitumbok nga responsable sa krimen nailhan lang sa pangalan nga ‘Ian Laguna’ nga molupyo usab sa maong barangay.
Sa pakighinabi sa Banat News ni SPO2 Matias Galo, sa Danao City Police Station, mibutyag kini nga ang inahan sa biktima nga si Fernanda midangop sa ilang buhatan ug nagpakitabang human gipusil ang iyang anak.
Sa imbestigasyon sa kapolisan nasuta nga ang biktima migawas sa ilang panimalay aron abi-abihon ang iyang mga higala nga anaa sa gawas sa ilang panimalay.
Sa diha nga migawas na kini ug nagkig-estorya sa iyang mga higala kalit lang nga mipatim-aw ang suspetsado ug sa walay daghang pangutana gipusil niini ang biktima makatulo ka higayon.
Ang biktima nakaangkon og duha ka samad pinusilan sa iyang tiyan ug usa sa likod nga bahin sa iyang lawas ug daling gidala sa Danao City District Hospital apan gideklarar kini nga dead on arrival. Human sa maong panghitabo, ang suspetsado dali usab nga misibat palayo sa maong lugar.
Nagduda karon nga posibleng may kalambigitan sa gang o ‘grupo-grupo’ sa mga batan-on ang motibo sa maong krimen.
“Kaning ingon ana nga klase sa away, frat-frat jud ni..bawos-bawos ba,” pasabot pa ni Galo.
Ang kapolisan nangita pa karon og mga saksi sa maong krimen samtang nagpadayon ang imbestigasyon. (BANAT NEWS)