Mga biktima sa sunog gipahiluna na

CEBU, Philippines - Gipahiluna karon sa tulunghaan sa Banilad Elementary School ang mga nabiktima sa sunog sa miaging Sabado sa hapon nga taga Back Shell sa sitio Fatima sa barangay Banilad, dakbayan sa Mandaue.

Si Bise Mayor Glenn Bercede miingon nga ilang gibutangan og mga tulda   ang lugar nga nasunogan alang niadtong walay gusto nga adto mo-estar sa eskuylahan sa barangay Banilad.

Matud pa ni Bercede nga ang buhatan sa Social Welfare and Development Office sa dakbayan sa Mandaue padayong nang-apud-apod og pagkaon ug uban pang panginahanglan sa mga biktima.

Segun pa ni Bercede nga ang mga opisyal sa barangay Banilad may mga lakang nang gihimo aron sa pagpanghatag og bugas, linatang pagkaon, habol, banig ug mga kahimanan sa kusina.

Midugang siya nga ilang paninguhaon nga madali sa Barangay Disaster and Coordinating Council ug ang City Disaster and Coordinating Council (CDCC) ang pagdeklarar nga calamity area ang lugar nga nasunogan aron gawasnon si Mayor Jonas Cortes nga makapagawas og pundo gikan sa calamity fund sa dakbayan aron ikatabang sa dugang pang panginahanglan sa mga biktima sa maong katalagman.

Gumikan niini giawhag sa bise mayor ang tanang molupyo sa Mandaue nga mag-amping sa ilang mga lihok sa panimalay ilabi na ang pagsusi matag karon ug unya sa instalasyon sa kuryente sa ilang balay aron masiguro nga dili mahimong sinugdanan sa sunog ang ilang linya sa kuryente. 

Nasayran gikan kang   SFO4 Roy Garcia , chief investigator sa kabomberohan sa dakbayan nga mikabat sa P1.2 milyones ang banabana sa kadaot sa mga kabtangang gikaon sa kayo   nga wala pa hisayri ang hinungdan.

Dugang pa ni Garcia nga base sa mga nakasaksi, nasuta nga ang kayo nagsukad sa   ikaduhang andana sa balay ni Joseph Oncoy ug mikatap dayon kini ngadto sa sikbit nga mga balay nga kasagaran ginama sa gaan nga materyales. (BANAT NEWS)