Bana gibiyaan sa asawa naghikog

CEBU, Philippines - Usa ka bana nga gibiyaan sa asawa tungod   sa pagkasugarol, naghikog didto sa ilang balay sa barangay Lamac lungsod sa Consolacion sa miaging gabii.

Ang naghikog mao si Josmar Velasquez, 35, lumad nga taga barangay Kasungtingan, syudad sa Mandaue.

Sa inisyal nga imbestigasyon sa kapolisan nasayran nga usa ka ginganlan og Korodong ang tag-iya sa balay nga gipuy-an ni Velasquez gipangayuo-an og panabang sa ilang mga silingan human nila masigpati ang nagbitay nga lawas sa biktima sulod sa ilang balay.

Si Korodong dali usab nga mitawag og polis ug didto naabtan pa sa mga otoridad nga nagbitay si Velasquez sulod sa iyang lawak ginamit ang usa ka lambo.

Si Ritchell, ang asawa ni Velasquez mibutyag sa kapolisan nga gibiyaan niya ang iyang bana tulo na ka semana ang nakalabay kay dili na siya makaantos sa pagka-sugarol niini.

Nasayran gikan kang Ritchell nga hilig kaayo si Velasquez sa sugal nga buwang  ug mahjong ug napakyas usab kini sa pagtuman sa iyang responsibilidad isip padre de pamilya.

Nasayran usab sa kapolisan nga sa wala pa maghikog si Velasquez, pipila ka adlaw ang milabay nanghangyo kuno kini sa iyang mga higala nga mangaligo sa dagat aron mahuwas-huwasan siya sa iyang gibati nga kaguol sa pagbiya sa iyang asawa.

Unya sa ilang pagpangaligo, misuway na unta og lumos sa iyang kinabuhi si Velasquez apan maayo nalang kay natabang kini sa iyang mga higala.

Dako ang pagduda sa kapolisan nga ang tumang kaguol gumikan sa pagbiya sa iyang asawa maoy usa sa hinungdan sa paghikog niini apan ila pa usab kining sutaon kun wala bay laing rason   ang iyang pagpakamatay. (BANAT NEWS)