Gilapsan sa mga bala namatay

CEBU, Philippines -  Patay ang usa ka tawo human masabak sa mga bala sa buko-buko ug milapos sa tiyan gikan sa nagsakay og motorsiklong mipusil kaniya sa dalan Lopez Jaena sa barangay Poblacion, dakbayan sa Lapulapu sa miaging kaadlawon.

Si PO2 Franklin Bolaquia sa homicide section sa kapolisan sa maong dakbayan miila sa biktima nga mao si Allan Calbadores, 18 , ulitawo nga taga sitio Langob sa barangay Poblacion sa maong dakbayan.

Matud pa ni PO2 Bolaquia nga kuyog sa biktima ang igsoon niini nga naglingkod-lingkod sa maong dapit atbang sa usa ka burger machine sa dihang mihunong ang usa ka motorsiklo nga gikabay-an sa duha ka wala hiilhing tawo.

Dugang pa niya nga ang nag-angkas sa luyo maoy nanaog ug maoy miluthang sa biktima. Ang biktima naigo sa bukobuko duha ka higayon ug milapos usab ang mga bala   sa tiyan ug human sa maong pagpusil mipabulhot dayon ang motorsiklo sa pagpadagan pahilayo sa maong dapit.

Gidala sa Lapulapu City District Hospital ang biktima apan gideklarar kini ni Dr. Alimer Almerante nga patay na sa pag-abot niini sa maong tambalanan.

Padayon pang gipangita sa kapolisan ang kriminal.(WC) (BANAT NEWS)