Nagtangkil og .45 pistola natiklo

CEBU, Philippines -  Mikagulkol sa prisohan ang usa ka 29 anyos nga mag-uuma human masakmiti og .45 kalibreng pistola inflagrante delikto sa kapolisan atol sa kasaulogan sa piyesta sa barangay Bagakay, lungsod sa Sibonga, kagahapon sa alas 12:30 sa kaadlawon. Ang suspetsado nailhan nga si Alfredo Perez y Estudillo, 29, minyo nga taga barangay Taluot, Argao.

Si SPO4 Rolando Almonicar sa Sibonga Police Station mibutyag sa Banat News nga usa ka molupyo sa Bagakay maoy misumbong sa duha ka polis nga gidestino sa pagbantay sa kalinaw ug kahusay sa piyesta sa maong barangay kalabot sa usa ka tawong nagtangkil og armas de fuego. Diha-diha miresponde dayon sila si SPO2 Marlon Sabido Cortes ug PO1 Jovannie Mura Calderon ug gisuta ang suspetsado. Dihang nakita nila ang nagbagal nga hawak niini, ila dayong gihinol busa nakonpirmar nga armas de fuego ang gitangkil niini ug diha-diha ila kining gisakmit. Nasuta sa kapolisan nga usa ka .45 kalibre nga Colt pistol nga may unom ka buhing bala ang maong armas.

Dihang napakyas kini sa pagpakita sa mga papeles nga nagtugot kaniya sa pagdala sa maong armas gidala dayon sa duha ka polis ang maong suspetsado ngadto sa buhatan sa Sibonga Police Station.

Gitanggong siya karon didto samtang gipaabot ang kasong isang-at batok kaniya.( /WC) (BANAT NEWS)