CEBU, Philippines - Usa ka polis ang napalgan sa iyang mga kauban nga nagkadugo ug nakaangkon og mga samad pinusilan sa iyang duha ka tiil sa lugar nga gitumbok nga naghitak sa ginadiling drugas sa sitio Mohon sa barangay Langtad siyudad sa Naga kagahapon sa alas 6:45 sa buntag.
Apan bisan paman niini, gikatakdang imbestigahan ang biktimang si PO1 Antonio Icalina, molupyo sa barangay Opao siyudad sa Mandaue.
Si Icalina kanhi nadestino sa Naga City Police Station apan gibalhin na sa lungsod sa Tudela sa isla sa Camotes niadto pang buwan sa Enero ning tuiga may labot sa imbestigasyon sa ginadiling drugas.
Lima ka mga lalaki ang gitumbok nga responsable sa krimen ug padayon pang gipangita sa kapulisan sa paghimo ning balita.
Matud ni PO1 Rongie Nadora, desk officer sa Naga City Police Station dihang nahinabi sa Banat News usa ka concerned citizen ang mitawag ug mipahibawo sa ilang buhatan kabahin sa usa ka tawo nga nagbuy-od sa maong lugar dapit na sa highway nga may samad pinusilan.
Apan pagresponde sa mga polis nakugang sila nga ilaha kining kanhi kauban nga si Icalina. Dunay duha ka nanglapos nga samad pinusilan sa iyang mga tiil ug dali nilang gidala sa South General Hospital.
Gibutyag ni Sr. Insp. Rolando Evalle, hepe sa Naga City Police Station subay sa imbestigasyon ang biktima mitug-an nga lima ka mga lalaki ang milayog kaniya sa sudlonon nga bahin sa maong dapit ug giilog ang iyang armas ug pagkahuman gipusil siya.
Matud ni Evalle human gibiyaan sa mga gikatahapan si Icalina mikamang kini gikan sa sud paingon sa highway nga gibanabanang 130 ka tiil hangtud nga may nakamatikod kaniya ug mitawag sa kapolisan.
Base usab sa gihimo sa mga gikatahapan, nagtuo ang mga imbestigador nga wala gyuy plano ang mga gikatahapan nga patyon si Icalina maong sa tiil lang kini gipusil.
Gi-angkon ni Evalle nga naglisod gyud sila pagtumbok sa mga gikatahapan tungod kay pulos nangambot ang mga molupyo sa maong lugar ug walay interesadong mikooperar paghatag og impormasyon.
Si Sr. Supt. Patrocinio Comendador, ang direktor sa Cebu Police Provincial Office (CPPO) mimando na sa dinali-ang imbestigasyon sa maong kaso ug sa pagsikop sa mga responsable.
Apil sa gimandong imbestigahon mao si Icalina kun nganong naabot kini sa maong lugar nga nabaniog naman kining dapita nga gihugpaan sa ilegal nga drugas.
Dili palang dugay nakasikop ang kapolisan og duha ka tawo sa maong lugar nga nalambigit sa paggamit og ginadiling drugas.
Matud ni Evalle tanang anggulo ang gitutukan karun nila sa nagpadayong imbestigasyon ug apil sa ilang gi-verify karun ang unconfirmed report nga tiggamitan og ginadiling drugas ang biktima.
Si Icalina giingong gibalhin sa kanhi hepe sa Cebu Police Provincial Office (CPPO) niadtong Enero gumikan gihapon sa suliran sa ilegal nga drugas apan wala matino kun nalambigit ug tiggamitan ba kini niini. (EIM) (BANAT NEWS)