Kapitan sa Dumanjug gipadakop

CEBU, Philippines- Nalutsan og warrant of arrest si Kapitan Erwin Gica sa barangay Sima, lungsod sa Dumanjug ug ang igsoon niining si Efren Guntrano Gica kinsa naparot sa pagka-mayor sa miaging eleksiyon.

Si Municipal Circuit Trial Court Judge Anacleto Debalucos mirekomendar sa piyansa nga P12,000 matag usa alang sa temporaryong kagawasan sa magsoong Gica kinsa nag-atubang karon og kasong attempted homicide human gitumbok sila nga suspek sa pagpusil sa pag-umangkon ni Gobernador Gwendolyn Garcia sa miaging tuig.

Si Efren konsehal sa lungsod niadtong higayona ug napilde kini sa igsoon ni Garcia nga si Mayor Nelson Garcia sa eleksiyon niadtong Mayo 10, 2010.

Apan ang insidenti nahitabo sa usa ka disko nga gipasiugdahan sa Sangguniang Kabataan niadtong Mayo 12.

Ang magsoong Gica mipasangil nga sila ang gi-ataki atol sa disko ug ilang gitumbok ang grupo sa biktima nga si Lou Oliver Garcia nga maoy namusil kanila.

Apan ang kapolisan nakakuha og testigos nga nagtumbok kang Erwin nga maoy mipusil ug nakaigo sa abaga ni Oliver.   (BANAT NEWS)