Trak nawad-a'g preno 2 angol

CEBU, Philippines - Duha ka tawo ang naangol nga naglakip sa batang 8 anyos, dihang nawad-an og preno ang usa ka 10 wheeler truck ug midusmog sa usa ka tindahan sa mga prutas unya milahos sa usa ka punoan sa lubi didto sa dalan national sa barangay Talavera, lungsod sa Borbon kagahapon sa alas 8:00 pasado sa buntag.

Ang mga biktima mao sila si Benjie Tuz Bargamento, 8, nagpuyo sa maong dapit ug Cliford Cortes, 19 , helper sa    nahisgotang   de karga nga gimaneho ni Ben Alguno, 35, nga taga sitio Agsungot, barangay Talamban, dakbayan sa Sugbo.

Si SPO3 Morie Magdadaro sa kapolisan sa maong lungsod nga nahinabi sa Banat News miingon nga base sa gitug-an sa drayber ngadto kanila nga gikan pa sila  sa dakbayan sa Naga nga nagkarga og sinakong semento paingon sa amihanang lungsod sa lalawigan sa Sugbo.

Apan sa pag-abot nila sa usa ka dulhogong bahin sa maong lugar wala na mosakat ang preno sa sakyanan busa gipadusmogan nalang sa drayber ang tindahan sa mga prutas daplin sa karsada.

Apan wala makapugong ang maong   tindahan, busa milahos ang trak ug didto na kini mohunong sa punoan sa lubi.

Ang bata nga si Bargamento nga maoy nagbantay sa tindahan, nakadagan apan ang natumpag nga tindahan maoy nakasamad ug nakabun-og kaniya.

Mao usab si Cortes nga didto sa sakyanan nabun-og usab ang lawas gumikan sa kusog nga pagkapat-ol niini sa bongbong sa trak dihang midusmog kini sa punoan sa lubi.

 Si Alguno nga maoy drayber mitahan dayon sa kapolisan   samtang ang mga angol gidala dayon ngadto sa Sogod District Hospital. (WC) (BANAT NEWS)