CEBU, Philippines - Walay nakitang problema si Gob. Gwendolyn Garcia nga ilubong ang patay’ng lawas sa kanhi diktador nga si presidente Ferdinand Marcos sa Libingan ng mga Bayani.
Si Garcia nga suod karon nga higala sa anak nga babaye ni Marcos nga si Ilocos Norte Gob. Imee Marcos, nagkanayon nga bisan managlahi ang interpretasyon sa pagkabayani sa usa ka tawo tataw nga may mga kaayuhang nakab-ot ang mitaliwang Marcos.
Gidasig niya ang publiko nga lantawon ang mga maayong nahimo ni Marcos ug dili ang iyang kasaypanan.
Ang Libingan ng mga Bayani maoy dapit diin ilubong ang mga pangulo sa nasud, kapikas sa pangulo, mga sundalo, ug uban pang giilang nakahimo og kabayanihan sa buhi pa sila.
Si Marcos nahimong Kongresista, Senador, Senate President ug ngadto na sa pagkapangulo sa nasud. Sa panahon ni Marcos natukod ang una nga Mandaue-Mactan Bridge sa Sugbu ug uban pang mga dagkong mga proyekto ug programa.
Si Marcos ug ang iyang mga kaalyadong pamilya kon ‘cronies’ gipasanginlang mikawkaw sa panudlanan sa Pilipinas, extra-judicial killings, political killings ug uban pa. (BANAT NEWS)