Mitulis sa jewelry store nadakpan

CEBU, Philippines -  Nadakpan sa follow-up operation sa mga sakop sa Theft and Robbery Section (TRS) sa Cebu City Police Office (CCPO) ang 22-anyos nga lalaking ex-convict nga gipasanginlang mitulis sa fashion jewelry Store sa Junquera Extention sa barangay San Antonio niadtong Mayo 7.

Si Luis Barangan Miñoza, taga barangay Kamagayan ning siyudad niadto lang Nobiyembre nakagawas sa Cebu City Jail tungod sa kasong robbery. Siya nadakpan sa mga sakop ni Chief Insp. Bonifacio Garcia sa miaging alas-3 sa hapon diha sa Kamagayan.

Si Miñoza miangkon siya maoy mitulis sa J&A A Wholesale 4 U Fashion Jewelry niadtong Mayo 7 uban nila ni Pedro Vergara ug ginganlan lang ug Chad nga pabiling gipangita sa kapulisan.

Gibana-banang moabot sa P230 mil ang kantidad sa nadala nga mga alahas nga silver sa mga suspek sa maong tindahan nga gipanag-iya ni Jujiza Tingal.

Ang pagkasikop ni Miñoza giabagan ni Kapitan George Rama.

Si Miñoza mitug-an nga didto niya gibaligya ang mga silver sa usa ka Robert Ramirez.

Si Chief Insp. Garciano nga nahinabi sa Banat News nagkanayon nga ilahang iapil sa pagpasaka og kaso si Ramirez nga kalapasan sa Anti Fencing Law.

Narekober sa kapulisan ang pipila nalang ka lugas sa mga alahas nga silver diha sa asawa ni Ramirez sanglit ang naulahi giingong wala diha atol sa pag-adto sa kapulisan.

Matud ni Garciano nga ang ubang mga alahas nga miabot og 400 gramos gitunaw samtang 112 gramos nalang ang narekober sa asawa ni Ramirez.

Si Miñoza miangkon nga miabot lang og P17 mil ang iyang halin sa mga alahas nga silver ug ang halin nahurot ra sa iyang bisyo sa ilegal nga drugas diha sa Kamagayan.

Matud ni Garciano nga padulong na mo-inject og nubain si Miñoza diha sa maong barangay dihang ila kini naabtan.

Si Miñoza miangkong sulod-gawas na siya sa Operation Second Chance kaniadto sa menor de edad pa siya hangtud nga nabilanggo gyud siya og lima ka tuig sa City Jail tungod sa kasong robbery ug nakagawas niadto lang Nobiyembre sa miaging tuig.

Si Blessa Tingal, bayaw sa tag-iya nga si Jujiza miingon nga kanapulo ka higayon nagbalik-balik si Miñoza sa ilang tindahan nga nagpasumangil nga mopalit og silver hangtud nga naglagot siya kay dili gyud kini mopalit. Matud ni Miñoza, gituyo niya kadto aron maniid kun wala bay tawo ang tindahan ug niadtong Mayo 7 iya na gyud kining gitulis uban sa laing duha niya ka mga kauban.(EIM) (BANAT NEWS)