CEBU, Philippines - Usa ka lalaking gituohang adunay dakong problema nga giingong nagkadugo nga misulong sa panimalay sa silingan ang namatay sulod sa iyang balay samtang ang mga polis nag-atang kaniya diha sa gawas.
Ang maong duguong insidente nahitabo pasado alas-9 sa buntag kagahapon sa Velpal Phase 1, barangay Pakigne lungsod sa Minglanilla diin usa ka Elizer Peña, 27, nga molupyo sa maong lugar ang namatay ug gituohang naghikog tungod sa nakit-ang samad hiniwaan sa iyang pulso.
Nagtuo ang mga polis nga dili lang samad sa pulso ang naangkon niining kadaot sa lawas nga nakaingon sa iyang kamatayon nga gipaabot nilang mahibaw-an human sa awtopsiya sa patay’ng lawas niini.
Sa pakighinabi sa Banat News ni PO1 Evie Espina, sa Minglanilla Police Station mibutyag kini nga usa ka Joseph Nellas, maoy mitawag sa ilang buhatan tungod sa pagpamugos og sulod ni Peña sa ilang balay.
Matud pa nga nangahadlok ang banay ni Nellas nga kini pasudlon tungod kay nagbitbit kini og kutsilyo ug nagkadugo ug nagpunay og patid sa ilang pultahan sa walay igong hinungdan maong mitawag sila og polis.
Dihang naabot ang mga polis pinangulohan ni SPO1 Florante Capangpangan diha na sa ilang koral si Peña apan gi-lock niini ang gate maong igo nalang kini gialam-alaman ug giawhag nga kuyogan sa tambalanan tungod kay nagkadugo na kini.
Si PO2 Ambri Alpas misuway unta sa pagpaduol kang Peña apan gikatahong gihanaan siya og dunggab sa naulahi ug daling midagan sulod sa iyang balay ug nanirado.
Tungod niini, ang mga silingan ni Peña mitawag sa igsuon niini nga nagtrabaho sa usa ka unibersidad sa dakbayan sa Sugbu ug gipahibalo sa nahitabo ug aron usab makasulod ang mga polis.
Human sa usa ka oras, miabot ang igsuon ni Peña ug daling giguba ang gate sa ilang panimalay aron sila makasulod apan nakugang nalang sila nga nagpasad ug nagbanaw ang dugo sa sawog ug nagbuy-od si Peña.
Daling gidala si Peña sa iyang igsuon sa South General Hospital apan pipila ka minutos ang milabay nakabsan ra usab kini sumala pang Espina.
Nakuha sa crime scene ang gunting nga adunay dugo nga posibleng usa usab sa gigamit niini sa pagpasakit sa iyang kaugalingon.
Matud pa sa igsuon ni Peña ngadto sa kapolisan nag-antos ang iyang igsuon og mild stroke ug gani kagahapon sa diha nga padulong na siya nga molakaw iyang nabantayang naghinuktok kini.(ug Marife Amores, CNU /EIM) (BANAT NEWS)