Ni Rey B. Pasaporte/EIM

CEBU, Philippines -  Lima ka mga opisyal sa kapulisan sa probinsya ang gipiliang ipuli sa mi-resign nga hepe sa kapulisan sa lungsod sa Compostela nga si Sr. Insp. Rodrigo Giangan.

Ang lima pulos nagranggo’g Police Inspector ug Senior Inspector usa niini nadestino sa provincial headquarters samtang ang upat gikan sa kalungsoran.

Si Sr. Supt. Patrocinio Comendador, hepe sa kapulisan sa probinsya nga nahinabi sa mga tigbalita kagahapon nagkanayon nga iyang ipuli kang Giangan sa Compostela usa ka isog ug dili mahadlok sa mga politiko diha sa naasoy’ng lungsod.

Si Giangan sa sayo pa, miluwat sa iyang katungdanan isip hepe sa kapulisan sa Compostela niadtong Lunes sa rason nga na-pressure siya (Giangan) sa nahitabong tensyon niadtong Miyerkules ug Huwebes sa miaging semana sa dihang milingkod sa munisipyo si mayor-elect Joel Quiño.

Si Giangan nagpabilin gihapon sa Compostela Police Station samtang wala pay natudlong ipuli kaniya. Nagdumili pa hinuon si Comendador pagbutyag sa pangan sa maong opisyal nga iyang ipuli kang Giangan.

Iyaha silang irekomendar ngadto kang OIC mayor Pedro Noval nga maoy mopili aron ibutang nga permanenting hepe sa kapulisan sa nahisgutang lungsod. (BANAT NEWS)