Kalangay pagbayad sa utang ipasusi

CEBU, Philippines -   Ipasusi na ni Mayor Rama ang hinungdan kun nganong nadugay ang pagbayad sa siyudad sa utang nila nga P9 milyones sa tambal sa Pro-Poor Pharmacy nga gipanag-iya ni Myra Rentuza.

Ang maong lakang gihimo ni Rama human manghulga si Rentuza nga mokiha sa siyudad gumikan sa kapakyas pagbayad niini sa ilang obligasyon.

 Ang maong kantidad nag-agi sa programang City Hospitalization Assistance and Medicines Program (Champ) diin ang siyudad mohatag og libreng tambal pinaagi sa mga kauban nilang mga botika.

Nagtuo hinuon si Rama nga usa sa mga rason nga nalangan pagbayad ang siyudad mao ang sistema sa dokumentasyon.

Sumala pa niya nga matag transaksyon sa gobyerno mag-agi og daghang proseso busa mao na kini ang iyang ipatan-aw karon kung unsay mga kakuwangan niini.

May mga higayon pa nga masangit sa Commission on Audit (COA) ang mga ebalwasyon sa mga papeles ilabi na sa pag-audit niini sumala pa ni Rama.

Kahinumdoman nga ang P2.1 milyones sa P9 milyones nga utang sa siyudad gikuwestiyon sa COA gumikan kay nagkuwang kini sa hustong dukumentasyon.

Masaligon hinuon ang mayor nga mabayran sa siyudad ang maong utang sa higayong makompleto na ang mga panginahanglanon nga papeles sama sa mga prescriptions ug Memorandum of Agreement sa Pro-Poor Pharmacy.

Samtang gitataw sa tag-iya nga si Rentuza nga kinahanglang ang siyudad na maoy mosulbad niining problema ngadto sa COA.

Sumala pa niya nga maapektohan na ang iyang negosyo gumikan sa kadako sa maong utang ug gihulga pa siya sa iyang supplier nga pasakaan og kasong estafa

Kasamtangang gisuspenso una sa Pro-Poor Pharmacy ug sa kauban niining botika nga Pro-Inay ang ilang transaksyon sa CHAMP hangtud nga mabayran sila sa siyudad. (BANAT NEWS)