TCPS gipasidunggan

CEBU, Philippines -  Pito ka mga pulis nga naglakip sa tulo ka mga opisyal sa kapulisan sa dakbayan sa Talisay ang gipasidunggan kagahapon sa udto ni Sr. Supt. Patrocinio Comendador, pangulo sa kapulisan sa probinsya.

Ang gipasidunggan mao sila si Chief Insp. Eddie Recamara, Officer in Charge (OIC) sa Talisay City Police Station, Insp. Hugo Rio Ipong; Insp. Ricardo Echavez; PO3 Rey Abellana; PO3 Benedicto Lasque; PO3 Mikie Espina ug PO2 Roy Lofranco.

Ang nadawat nila nga pasidungog may labot kini sa ilang dinaliang kalampusan pagsikop sa duha ka suspetsadong tulisan nga sila si Julius Racaza ug Ramses Abatayo nga mitulis ni Board Member Julian Daan alias ‘Teban Escudero’ niadtong Lunes sa buntag diha sa pinuy-anan niini sa barangay Tabunok.

Misaad ang bokal nga karung Lunes atol sa sesyon sa Hunta Probinsyal mopalabang siya og duha ka resolusyon aron iyang pasalamatan ug pahatagan niya og pasidungog ang kapulisan ug ang ikaduha mao nga iyang paghatag og duha ka computer set sa Talisay City Police Station pinaagi sa resolusyon sa barangay Poblacion.

Si Comendador miklaro nga nasulbad kini dayon tungod kay adunay mibarog nga mga testigo dili tungod kay dakong opisyal si Daan. Si Chief Insp. Recamara miingon nga ilaha nang gisang-at kagahapon sa hapon ang kasong Robbery with Violence and Intimidation batok nila ni Racaza ug Abatayo. (BANAT NEWS)