CEBU, Philippines - Usa ka amahan ug usa ka inahan usab ang pulos naghikog tungod sa gihambing mga sakit nga giingong wala na nila maagwanta.
Tungod sa tumang kaguol sa nagkagrabeng sakit sa breast cancer usa ka ginang ang nagpakamatay pinaagi sa paghikog diha sa sitio Cabatuan barangay Poblacion lungsod sa Ginatilan niadtong Martes sa alas 10:30 sa gabii.
Ang nagpakamatay mao si Vilma Tolen Gutana, 38, ug molupyo sa nahisgutang lugar.
Matud ni PO2 Meric Pampilo sa Ginatilan Police dihang nahinabi sa Banat News namatikdan sa mga kabanay nga sukad nga na-diagnose nga may stage 4 breast cancer si Gutana nagmagul-anon na kini.
Ang bana niini nga si Jesus Chito Gutana, maoy nakadiskubre sa maong ginang nga nagbitay na ug wala nay kinabuhi sulod sa ilang payag-payag sa luyong bahin sa ilang balay. Giingong migamit og pisi nga gihigot sa liog ug ang pikas tumoy ngadto sa ibabaw nga bahin sa payag ang ginang sa iyang paghikog.
Ang mga kabanay sa ginang mihulagway nga naguol gyud kini og maayo nga gipahibalong wala nay kaayohan ang iyang breast cancer maong nagpakamatay.
Samtang usa ka 45-anyos nga lalaki ang napalgang patay ug nagbitay na sulod sa ilang balay kagahapon diha sa sitio Kalubihan, Banawa sa barangay Guadalupe siyudad sa Sugbu.
Si Anghel Sapalla 45, napalgan sa iyang asawa nga wala nay kinabuhi alas-7:35 kagahapon sa buntag.
Si PO2 Jodan Batucan sa Homicide Section sa Cebu City Police Office (CCPO) nagkanayon nga niadtong Martes mihangyo pa si Sapalla ngadto sa iyang asawa ug anak nga magpa-admit sa tambalanan tungod sa iyang sakit nga stage 3 Colarical cancer apan giingong gibalibaran kini sa iyang asawa gumikan kay walay kwarta nga ikapatambal sa hospital.
Matud ni Batucan nga ang usa sa siyam ka anak ni Sapalla giingong duna say sakit sa itlog nga ‘danlak’ ug anaa karun sa tambalanan.
Hinuon nasuta sa kapulisan nga walay timailhan nga dunay foul play ang kamatayon ni Sapalla. (EIM)(BANAT NEWS)