Gwen motabang ni Hayashi

CEBU, Philippines -    Gusto ni Gobernador Gwendolyn Garcia nga makigkita kaniya si konsehal Josie Hayashi sa barangay Punta Engano, dakbayan sa Lapu-lapu bahin sa iyang reklamo batok sa mga illegal nga mga mananagat nga giingong mihasi kaniya.

Ang maong lakang sa gobernador nahimo human masayri ang taho kalabot sa giingong hulga nga nadawat ni Hayashi gikan sa grupo sa illegal nga mga mananagat gumikan sa sub-sub niyang pag suporta sa kampanya sa gobernador batok sa illegal fishing. Matud pa ni Garcia nga nagpaabot pa siya sa opisyal nga detalye sa maong hitabo gikan mismo ni konsehal Hayashi aron makahatag usab ang iyang buhatan og tukmang aksyon.

Maoy hinungdan nga gusto siyang moadto sa iyang buhatan si Hayashi aron makasulti kini sa tanan.

Nasayran nga si Hayashi maoy usa sa mga aktibong miyembro sa Provincial Anti- illegal Fishing Task Force (PAFTF) nga gitukod ni Gobernador Garcia aron masumpo ang illegal nga matang sa panagat dinhi sa probinsiya sa Sugbo.

Kahinumdoman nga daghan nang malampuson nga operasyon sa mga miyembro sa PAFTF niadtong buwan sa Abril diin nikabat na sa kapin P1 milyon   ang balor sa nasakmit nga mga gasang, budjong, tambuli ug gagmay nga iho didto sa Punta Engano tungod sa paningkamot ug kamaabtikon ni Konsehal Hayashi. (BANAT NEWS)