Gwen di manginlabot sa protesta ni Wagas

CEBU, Philippines - Si Gobernador Gwendolyn Garcia mitataw nga dili siya manginlabot sa electoral protest nga gisang-at ni kanhi mayor Richie Wagas sa lungsod sa Compostela ngadto sa Commission on Elections (COMELEC) batok kang mayor-elect Joel Quino sa maong lungsod.

Ang gobernadora mipasabot nga walay labot sa iyang jurisdiction ang COMELEC kay usa man kini ka independent body

Ang ikatabang lang sa gobernadora sa maong suliran mao ang pagdestino kang Regional Director Pedro Noval sa DILG aron maoy mo-atiman sa lungsod samtang wala pay mayor nga molingkod ug modumala niini.

Sa laing bahin gibutyag usab ni Garcia nga wala usab siya manginlabot sa kaso nga gisang-at ni Glenn Soco, ang iya kanhing tandem sa milabay’ng election, batok sa mitaliwan na nga si Bise- Gobernador Greg Sanchez.

Ang consultant sa gobernador nga si Rory Jon Sepulveda midugang nga usa na ka tuig kapin ang maong kaso apan hangtod karon wa pa gihapon maablihi ang mga ballot boxes alang sa recounting kay naghuwat pa sila sa schedule niini.

Si Garcia midugang nga ang rason nganong dili siya manginlabot sa maong kaso mao nga gikinahanglan usab niya nga panalipdan ang iyang katungdanan isip gobernador sa lalawigan sa Sugbo. (BANAT NEWS)