Manghod giluba sa maguwang

CEBU, Philippines - Gumikan sa pagpamadlong sa nag-videoke, usa ka manghod naangol human kini dunggaba sa iyang maguwang didto sa sitio Purok Kulo, barangay Canjulao, dakbayan sa Lapulapu sa miaging gabii nga nadakpan usab sa kapolisan ug gibalhog sa bilanggoan.

Ang biktima mao si Esmeraldo Cabalhog, 42 anyos, minyo,  ug ang suspetsado nga magulang niya mao si Vicente Cabalhog, 55 anyos, minyo usab ug managsilingan sa maong dapit.

Si SPO1 Manolito Abellanosa sa Homicide Section sa kapolisan sa maong dakbayan miingon nga nagsaulog sa birthday ang usa sa mga silingan sa biktima nga gitambongan usab sa suspetsado.

Aron mosamot ang kasadya, nagkinantahay sa videoke ang nanambong uban sa suspetsado.

Matud pa ni SPO1 Abellanosa nga ang biktima nga wala gyud makatulog gumikan sa kalangas sa nagkinantahay niyang mga silingan, migawas sa ilang balay ug namadlong nga ipaundang na ang kinantahay kay dili siya makatulog.

Apan mihiwasa sa kasuko ang suspetsado ug human magkalalis gilanit sa suspetsado ang iyang kutsilyo ug diha-diha gihansak ngadto sa biktima kansang walang kilid ug walang bukton maoy samdan.

Ang biktima daling gidala ngadto sa Lapulapu City District Hospital samtang nasikop usab dayon sa kapolisan ang suspetsado ug kasamtangan gibalhog sa bilanggoan ug gipaabot ang sumbong nga isang-at batok kaniya. (WC)(BANAT NEWS)