Lima ka buwang mabdos patay sa disgrasya

CEBU, Philippines - Patay ang usa ka lima ka buwang mabdos human kini malabay ug naugbok ang ulo sa semento dihang nadasmag sa laing motorsiklo ang ilang gisakyang motor nga miangol usab sa duha ka drayber ug laing usa pa ka 35- anyos nga ginang sa highway sa barangay Poblacion lungsod sa Liloan niadtong Lunes sa alas 9:05 sa gabii.

Ang biktima nga namatay diha-diha mao si Jerlyn Balila Kia Emphases, 31, molupyo sa Zone-4 sa barangay Dumlog siyudad sa Talisay.

Ang biktima nag-angkas sa motorsiklo nga gimaneho sa iyang bana nga si Benzyd dela Cerna Emphases, 30.

Samtang ang gikadinasmagay nila nga motorsiklo gimaneho usab ni Nilo Casag Malagar, 42, molupyo sa barangay Looc, Liloan samtang ang angkas mao si Novem Wagas, 35 , nagpuyo sa sitio Tuburan, Jubay Liloan.

Gani una nang gika-report nga nalatayan sa nahiaging cargo truck ang maong mabdos sa pagkalabay niini gikan sa motorsiklo hinungdan sa kamatayon ug gidakop usab unta dayon ang cargo truck apan gi-release sab dayun human negatibo sa gihimong pakisusi.

Matud ni SPO1 Claudio Castro Jr, traffic investigator sa Liloan Police dihang nahinabi sa Banat News ang duha ka motor pulos paingon sa amihanang bahin ug nag-una ang motorsiklo nila ni Malagar ug nagsunod ang magtiayong Emphases.

Apan mipakusog og padagan si Emphases ug misuway og apas sa nag-una nga motor apan kalit kini nga nawad-an sa preno hinungdan sa pagkadasmag niini sa gisuwayan og overtake nga motorsiklo ni Malagar.

Tungod niini nagdungan og kalamba ang duha ka motorsiklo ug nangalabay ang mga sakay.

Ang duha ka drayber ug laing babaye nga angkas daling gidala sa tambalanan samtang pag-responde sa mga polis nakahipos kini og impormasiyon nga atol sa hitabo dunay cargo truck nga nahiagi ug nalatayan pa gyud ang biktima nga mabdos.

Ang kapulisan sa Catmon nga daling gitawgan maoy mibabag sa maong trak nga gimaneho ni Roger Quiros Tabadas, taga barangay Maslog siyudad sa Danao.

Sa pagsusi sa mga imbestigador nasuta nga wala maligsi ang mabdos base usab sa ilang pagsusi sa trak hinungdan nga gibuhian si Tabadas. (BANAT NEWS)