Nag-birthday gipatay sa mga nagpailang polis

CEBU, Philippines - Usa ka lalaki nga nagsaulog sa iyang ika-32 nga adlaw’ng natawhan ang namatay human gipusil sa miaging alas-11 pasado sa gabii diha sa sitio Bas, Maria Luisa sa barangay Banilad siyudad sa Sugbu.

Ang biktima mao si Mario Bantasan, kinsa nag-birthday niadtong Lunes, samtang ang gipasanginlang mipusil kaniya mao sila si Efren Navales, 45, giingong operations manager sa usa ka towing company taga Oril sa barangay Banilad siyudad sa Mandaue, Mark Anthony Boyo, 28, liaison officer sa JPV Emission Testing Center nga taga Purok Mango sa barangay Umapad Mandaue, ug sakop sa Barangay Intelligence Network (BIN) sa Cebu City Police Office (CCPO) samtang ang ikatulo nga suspek nga lalaki pabilin pang wala mailhi sa kapulisan kinsa nakaikyas.

Narekober sa kapulisan sa crime scene ang duha ka empty shells sa .45 kalibre nga bala, usa ka buhing bala, usa ka slug sa .45 nga pistola nga nakuha sa mirespondeng sakop sa Special Weapons and Tactics (SWAT) pinangulohan ni SPO2 Jose Ragel, mga sakop sa Mabolo Police Station nga gipangulohan ni SPO3 Roldan Paler ug Mobile Patrol Car 009 pinangulohan ni PO3 Antonio Den.

Tulo ka mga saksi nga nagpangidaron 18, 15, ug 14 ang miila ug mitumbok sa duha sa tulo ka mga suspetsado nga maoy mipatay sa biktima.

Sa pasiunang imbestigasyon nila ni PO3 Geoffrey Gutual, PO3 Julius Mabunay, PO2 Cristobal Geronimo ug PO2 Leory Baguio sa Homicide Section nagbutyag base sa gitug-an kanila sa tulo ka mga saksi nga naglingkod sila daplin sa karsada nga nag-estoryahanay uban sa biktima niadtong higayona.

Dangtan pila ka minutos si Navales kalit naabot nga nagsul-ob og camouflage ug nagpailang pulis dayon miingon nga “ayaw mo dagan, police ko, ug moabot akong mga kauban.”

Wala magdugay miabot sa lugar ang ikatulong suspetsado nga wala pa mailhi sa kapulisan nga sakay sa motorsiklo ug milabay kanila ug pag-abot sa unahan mi u-turn ug mibalik dayong bunot sa dala niining armas ug gipusil makaduha ka higayon ang biktima ug naigo sa iyang dughan.

Ang tulo ka mga saksi naglumba sa pagpanagan ug nitago sa mas luwas nga lugar. Ang biktima gidali pagdala sa Gullas Memorial Hospital apan gideklarar nga dead on arrival (DOA).

Dugang imbestigasyon sa kapulisan, si Boyo nga nakit-an duol sa crime scene daling gisikop sa SWAT ug nakuhaan og usa ka .9mm nga armas, usa ka magazine nga dunay 15 ka buhing bala, Identification Card (I.D) sa Theft and Robbery Section (TRS) sa CCPO nga dunay iyang pangan, lisensya sa armas nga dunay permit to carry fire arms, usa ka kutsilyo, Motorola nga handheld radio (GP) 2000, cellphone ug motorsiklo nga walay plate number.

Si SPO1 Hanzel Wenceslao sa Mabolo Police Station nagkanayon nga ila pa kining susihon kun tinuod ba ang I.D nga nakuha sa posisyon ni Boyo sanglit duna kini kalainan sa iyang hitsura.

Si Navales nga positibong giila sa mga saksi boluntaryong mitahan sa kapulisan. Ang kapulisan nagtuo nga dili ang armas ni Boyo ang gigamit sa pagpusil sa biktima sanglit ang bala nga nakuha sa crime scene iya man sa .45 nga kalibre sa armas ug dili .9mm.

Si Sr. Insp. Zaldy Gokotano, hepe sa Homicide Section mihimo’g request aron ilang susihon kun license holder ba gyud si Boyo ngadto sa buhatan sa Firearms, Explosive and Security Agency Guards Supervision-7.

PO3 Gutual nga nahinabi sa Banat News nagkanayon nga ilaha nang giandam ang kasong murder batok sa mga suspetsado. (BANAT NEWS)