Usa patay, manag-amahan angol sa pagpamusil

CEBU, Philippines - Usa ang patay laing duha ang naangol apil na ang 10-anyos nga batang lalaki nga gihulagway’ng anaa sa kritikal ang kahimtang human sa nahitabong pagpamusil sa sitio Magsipit barangay Liboron siyudad sa Carcar niadtong Domingo sa alas 7:00 sa gabii.

Ang biktima nga patay nang nadangat sa tambalanan mao si Elizardo Navoa Limasak, 49, molupyo sa nahisgutang lugar samtang ang mga naangol mao sila si Jerwin Bargamento,31, molupyo gihapon sa maong lugar ug 10-anyos niining anak nga si Johnrel Bargamento.

Samtang ang gipasanginlang namusil kanila mao ang magsuong sila si Alfredo Limasak ug Gerry Limasak, mga molupyo gihapon sa maong lugar.

Matud ni PO3 Dante Ramas sa Carcar City Police Station dihang nahinabi sa Banat News subay sa imbestigasyon ang biktima nga si Elizardo kauban sa iyang asawa nga si Ponciana nag-estambay sa payag nga gipanag-iya sa usa ka Lino Pantilgan.

Ang mga suspek kalit lang miabot dala ang wala matinong kalibre sa armas ug gipamusil   sila si Elizardo ug asawa niini apan nakadagan paingon sa pinuy-anan ni Lino Pantilgan nga distansiya lang og pipila ka metros.

Apan gigukod gihapon kini sa mga suspek ug gisigehan og pusil hinungdasn nga naigo si Elizardo ug igo lang nakaabot sa pultahan sa panimalay ni Lino Pantilgan nahagba kini human makaangkon og samad pinusilan sa kalawasan.

Samtang ang manag-amahang biktima nga nag-videoke niadtong tungura ang napagan sab ug naigo si Jerwin sa tuong bahin sa tiil samtang ang 10- anyos nga anak niini naigo sa ulo.

Ang mga samaron gihatud sa mirespondeng mga polis sa Carcar District Hospital. Apan si Elizardo gideklarar nga dead on arrival.     - BANAT NEWS