Joavan mipadakop sa iyang amigo

CEBU, Philippines - Gipadakop ni Joavan Fernandez ang iyang suod nga higala niadtong Domingo sa gabii human giingong gikawat ang iyang motorsiklo.

Si Joavan nga kontrobersyal nga anak ni Mayor Socrates Fernandez mi-report sa kapulisan nianang alas-10 sa gabii ug mipadakop kang Roberto Ruby, 50, residente sa A. Lopez sa barangay Labangon siyudad sa Sugbu kinsa giingong mikawat sa Yamaha niya nga motorsiklo niadtong Domingo sa buntag.

Si Joavan miangkong iyang higala si Ruby apan giingong gikuha niini ang iyang motorsiklo didto sa balay sa iyang amahan sa barangay Candulawan siyudad sa Talisay.

Gawas sa pasangil wala na mohatag pa og dugang detalye si Joavan ngadto sa kapolisan kabahin sa nahitabo.

Apan sayo kagahapon sa buntag human makatulog og usa ka gabii sa bilanggoan si Ruby gibuhian kini sa kapulisan human si Joavan nakig-settle sa maong kaso.   (BANATNEWS)