CEBU, Philippines - Gidasig ni Gobernadora Gwendolyn Garcia ang publiko sa pagtabang sa kagamhanan sa lalawigan sa Sugbo sa pagpreserbar sa mga Gabaldon school buildings dinhi sa lalawigan sa Sugbo.
Matud pa ni Garcia nga angayan nga dili lamang ang kagamhanan sa lalawigan ug Department of Education (DepEd) ang mopreserbar sa mga karaang school buildings.
Kini tungod kay ang garbo nga maani sa paghimo sa maong programa iya man sa tanang mga Sugboanon apan mas mosamot nga mamahimong epektibo ug mahinungdanon ang programa kung ang mga Sugbuanon magpakabana niini.
Sigon pa ni Garcia nga mohimo sila og mga surveys sa mga Gabaldon school buildings aron hingpit nga mahibaw-an ang gidaghanon niini sa lalawigan.
Matud pa sa gobernadora nga gipreparahan karon sa iyang buhatan ang sharing scheme alang sa galastohan sa restoration project sa maong mga matang sa edipisyo.
Kahinumduman nga mitanyag ang lalawigan ug Department of Education nga maoy mopa-insure sa mga Gabaldon School Buildings aron pabilin kining maampingan bisan og matapos na ang iyang termino.
Aduna nay pribadong sektor nga miako sa maong programa apan giawhag sa gobernador ang publiko nga tabangan ang lalawigan sa maong tinguha. - BANAT NEWS