Gilabnihan og kawo gidunggab

CEBU, Philippines - Usa ka lalaki nga nabiktima sa manglabnihay ang gidunggab pa gyud sa kawatan atubangan sa simbahan sa Mabolo, sa dalan M. J. Cuenco ning siyudad sa Sugbo kagahapon sa kaadlawon.

Ang biktima nga nalanding sa tambalanan mao si Jay-r Coraza , 19, nagpuyo sa Panagdait, dakbayan sa Sugbo. Base sa imbestigasyon nila ni SPO4 Alex Dacua, SPO2 Jodan Batucan ug PO2 Codaste nga gikan nag-inom ang biktima kauban sa iyang mga higala ug samtang naglakaw pauli kalit nga mitunga ang wala mailhing lalaki ug gilabni ang iyang kawo dungan sa pagdunggab sa iyang likod.

Human niini daling miikyas ang maong kawatan samtang daling nagpahatud sa Cebu City Medical Center (CCMC) ang biktima samtang padayong gipangita sa kapolisan ang responsable.  - BANAT NEWS