Mag-uuma giatangan giluba patay

CEBU, Philippines - Patay ang usa ka lalaki tungod sa grabeng samad pinusilan ug dinunggaban sa kalawasan sa miaging adlaw pasado alas 12 sa udto sa barangay Salug sa lungsod sa Dalaguete.

Ang biktima giila nga si Esmeraldo, Pia Yamangpang Esmer 59, mag-uuma, ex-convict ug lumolupyo sa maong dapit. Samtang ang mga suspek giila nga sila si Nicanor Carin ug Alfonso Pia Alfon, 30, nga kaliwat ra sa biktima.

Base sa imbestigasyon sa Dalaguete Police Station usa ka testigo ang nakakita sa panghitabo ug mibutyag nga naglakaw ang biktima bitbit ang usa ka basket nga puno sa mga humay padulong na pauli dihang kalit gipusil makadaghang higayon sa mga suspek.

Matud pa nga ang usa migamit og pugakhang, human matumba ang biktima giusban kini pinaagi sa pagdunggab kaniya makadaghan nga maoy nakaingon sa hinanali niining kamatayon.

Sumala pa adunay gikuha ang mga suspek gikan sa biktima nga gituohang salapi dayon nagdaling misibat.

Sa pakighinabi sa Banat News sa imbestigador sa Dalaguete police station nga si PO2 Cleto Pia nasayran nga ang maong pagpatay adunay kalambigitan sa anak sa biktima nga nakabikil sa suspek nga si Carin.

Sa pagkakaron padayong gipangita sa mga kapulisan sa Dalaguete ang mga suspek.