Gipareglaha'g dunggab kritikal

CEBU, Philippines - Kritikal ang kondisyon sa usa ka bayong-bayong human kini pareglahe og dunggab didto sa Brgy. Alegrea, lungsod sa Cordova kagahapon sa kadlawon.

Ang biktima mao si Junrel Wahing, 16, ug residente sa maong dapit, samtang ang suspetsado naila lamang sa angga nga “Yoyoy”, hingkod nga residente sa Brgy. Gabi sa mao gihapong lungsod.

Base sa imbestigasyon ni SPO1 Larry Wagwag, sa kapolisan sa Cordova nasuta nga samtang naglakaw sa karsada ang biktima gisugat kini ni Yoyoy dayong dunggab sa walay igong hinungdan.

Ang biktima kinsa nasabak sa bukobuko dali nga gidala ngadto sa Lapulapu City Hospital ubos sa talandugong kahimtang.

Matud pa ni SPO1 Wagwag nga bisan wala nila hidakpi ang suspetsado apan pasakaan gihapon kini og kasong frustrated murder.

Nabantayan sa mga tigbasa sa Banat News nga wala pa mapitol sa kapolisan ug sa mga lokal nga mga opisyal sa kabarangayan ang mga mamareglahay sa dakbayan sa Lapulapu ug Cordova.  - Bong Soriano ug Marife A. Amores  ( BANAT NEWS)