FTP, angkas nalatayan sa trak patay

CEBU, Philippines -  Buak ang ulo sa usa ka field trainee police ug ang angkas niining tinun-an human sila malatayi sa ligid sa dump truck nga ilang gikabangga sa kurbadahun nga bahin sa barangay Candoling lungsod sa Ronda kagahapon sa alas 9:00 sa buntag.

 Ang mga biktima nga patay diha-diha ug gihulagway nga pulos napiyapi ang ulo ug buak ang mga helmet mao sila si PO1 Ralph Perolino Tabanag, 21, molupyo sa Poblacion, Badian ug kasamtangang nagbansay sa Field Training Program (FTP) sa Punta Princesa Police Station ning dakbayan sa Sugbo.

Ang kauban niyang nakalas mao si Neil Gerald Toncab,18, tinun-an sa high school sa lungsod sa Badian.

Samtang ang nakaligis nila mao ang dumptruck nga dunay plaka nga YCT-835 nga gimaneho ni Gifford Pasolojan,19, molupyo sa barangay Magdugo siyudad sa Toledo.

Matud ni PO2 Benjamen Bate sa Ronda Police dihang nahinabi sa Banat News subay sa imbestigasyon ang mga biktima nga sakay sa motorsiklo gikan sa siyudad sa Sugbo paingon nga mopauli sa lungsod sa Badian.

Ang dumptruck gikan sa lungsod sa Samboan ug paingon sa siyudad sa Toledo apan pag-abot sa sa kurbadahong bahin sa dalan gikatahong kalit mikawat sa pikas linya pagliko hinungdan nga napunggit niini ang motorsiklo. Ang mga biktima maayong pagkapasok ilawom sa dump truck ug gilatayan ang ilang mga ulo sa luyong ligid.

Samtang ang drayber gidakop sab dayun sa mirespondeng mga polis ug nabalhug na karun sa karsel samtang nagpaabot sa tukmang sumbong nga ipasaka batok niini. (BANAT NEWS)