CEBU, Philippines - Nadakpan sa kapolisan ang tulo sa unom ka mga suspetsado sa pagpanulis sa magtiayon alas- 8 pasado ang takna sa miaging gabii luyo sa Cebu International Convention Center sa barangay Guizo, dakbayan sa Mandaue. Ang nadakpan mao sila si Mariel Mercader, taga Tribunal, Centro sa maong dakbayan, Efegil Pormentera, 22, taga Ihawan, Mantuyong ug Alfie Bihag nga taga Ihawan sa maong dakbayan.
Samtang ang laing tulo ka mga kauban nga gipangita pa sa kapolisan mao sila si Mark Shane Layon, Leonard Retabale ug Julius Potot nga pulos mga batan-on ug nagpuyo gihapon sa maong dapit. Ang tulo ka mga dinakpan ug ang laing tulo nga gipangita maoy suspetsado sa pagtulis nila ni Retchie ug Nolan Mait, nga taga Pasencia Compound sa barangay Tipolo sa dakbayan sa Mandaue.
Si PO3 Leo Batigalao sa kapolisan sa Presinto 1 sa barangay Centro sa maong dakbayan nga nahinabi sa Banat News miingon nga naglakaw gikan sa Parkmall ang magtiayon sa maong lugar dihang nasigpatan sa mga suspetsado.
Giingong gisundan sa tulo ang magtiayon samtang nagsunod usab maoy nagsilbing lookout ug paghidangat sa ngitngit nga bahin daling gigunitan ang liog sa babaye ug lain usab ang migunit sa bana dayong deklarar nga tulis.
Nakuha ang shoulder bag sa biktima nga may sulod nga P2,000 ug duha ka mahalong cellphone, human niini daling miikyas ang mga tulisan padulong sa barangay Mantuyong nga diin diay magpuyo ang mga suspek.
Ang magtiayon midangop sa kapolisan hinungdan sa gihimong pagpangita diha sa Mantuyong ug gidemalas ang tulo nga nagbitbit pa sa bag sa biktima hinungdan nga gidakop sila nila ni PO2 Ryan Belinguer ug PO3 Edmond Villacora . Apan wala nay sulod ang maong bag sanglit giingong gipasa na nila sa ilang kauban. (BANAT NEWS)