Polis gipasanginlang nangawat

CEBU, Philippines -  Usa ka polis nga nadestino sa Presinto 3 sa Lapulapu City Police Office detention cell sa kapolisan sa dakbayan sa Lapulapu human kini gipasanginlang mitulis sa usa ka Japanese national alas-11 pasado ang takna sa miaging gabii sa dalan Maximo Patalingjug barangay Pajo sa maong dakbayan.

Ang maong polis (pangalan gipugngan una) gialigar sa biktimang si Masami Kon, 48, temporaryong nagpuyo sa City Light Garden sa dakbayan sa Nivel Hills, Lahug, dakbayan sa Sugbo, nga maoy mitulis kaniya.

Si Inspector William Humoc sa Theft and Robbery section sa kapolisan sa maong dakbayan miingon nga nagsakay sa iyang sakyanan ang maong Japanese national ug nagdagan kini subay sa maong dalan.

Sa paghidangat sa maong lugar kalit lang nasaghiran ang usa ka babaye nga naglakaw nga giilang usa ka Maria Elena Pag-usara hinungdan nga mikanaug si Kon gikan sa iyang sakyanan sa pagsusi sa kahimtang niini.

Niining tungura kalit nga miabot ang usa ka lalaki ug nagpailang polis ug gikuha ang pitaka ni Kon aron kuhaon ang lisensya apan milakaw ang maong polis dala ang wallet nga may sulod nga dakong kantidad ug wala na mobalik.

Ang maong langyaw daling nagpatabang sa kapolisan ug pipila ka gutlo ang nakalabay nahidangat usab ang maong polis ug mitugyan sa pitaka ug lisensya sa maong langyaw.

Apan pag-ihap sa langyaw sa sulod nga salapi sa iyang pitaka kuwangan na kini ug P5,000 na lang ang nahibilin hinungdan nga giposasan dayon ang maong polis sa mga sakop sa Theft and Robbery Section sa LCPO.

Sa follow up nga gihimo sa Banat News sa Presinto 3 sa Basak Police Station maoy ilang gibutyag nga off- duty sa miaging gabii ang maong polis nga ilang kauban. (EIM) (BANAT NEWS)