LPG miboto, bakery ugdaw

CEBU, Philippines - Gibana-banang mikabat sa P169 mil ang kantidad sa kadaot sa pagkasunog sa usa ka bakery human moulbo ang tangke sa liquefied petroleum gas (LPG) niini didto sa barangay Gairan, dakbayan sa Bogo sa miaging buntag.

Si PO3 Allan Dosdos, hepe sa kapolisan sa Bogo, mibutyag nga ang nasunog nga bakery gipanag-iya sa magtiayong Francis Biñan ug sa asawa niining si Flordeliza.

Midugang si PO3 Dosdos nga nagtrabaho ang tulo ka hornero sa bakery dihang kalit lang miboto ang tangke sa ilang LPG.

Diha-diha miulbo dayon ang sunog ug naugdaw ang bakery nga wala matabang sa bombero.

Hinuon walay kinabuhing naangin tungod kay abtik kaayong nakagawas gikan sa bakery ang tulo ka mga trabahante niini. (BANAT NEWS)