Human trafficking mikusog

CEBU, Philippines - Ang human trafficking usa ka lalisonong isyu nga wala kaayo hatagi og pagtagad sa taga media base sa nahipos nga kasayoran sa International Justice Mission (IJM) ug Peace and Conflict Journalism Network (PECOJON).

Sa gipahigayong seminar niadtong Abril 30 ug Mayo 1, 2011 gipaambit sa PECOJON ug IJM ang bahin sa human trafficking dili lang naglambigit sa prostitusyon sa kababayen-an apan naglangkob usab sa pagpamaligya og kidney ug panarbaho.

Gipasabot usab nga ang trafficking in person usa ka krimen nga naglambigit sa pagbaligya sa usa ka tawo nga supak sa kabubut-on niini.

Gibatbat sa maong mga grupo nga ang biktima sa trafficking mao kadtong misangko sa sexual exploitation o pagbaligya sa lawas sa babaye o gipugos sa pagpatrabaho nga walay sweldo.

Base sa nahipos nga report sa IJM niadtong tuig 2005 gibana-bana sa U.S. State Department nga mikabat sa 800,000 ang nabiktima sa trafficking dinhi sa nasud ug minilyon usab ang didto sa gawas.

Ang United Nations International Children Emergency Fund (UNICEF) mibana-bana nga sa maong gidaghanon 100,000 niini mga bata nga napugos sa pagbaligya sa lawas.

Sa tuig 2010 nasuta sa IJM nga may 286 ka mga biktima sa trafficking sukad pa niadtong tuig 2004 dinhi sa Metro Cebu nasalbar sa kapolisan.

Gikan sa tuig 2007-2010 ang IJM mikabat sa 106 ka mga trafficker ang nasikop sa kapolisan ug ang 105 niini napasakaan og kasong trafficking ug tulo kanila ang nakonbikto.

Sa napasakaan og kaso 41 niini mga manager, 31 mga bugaw, 18 mga tag-iya og establisamento, 14 mga recruiter ug duha ang tigdala sa gawas sa nasud sa   mga biktima.

Gikan sa tuig 2004 hangtud sa Marso 31, 2011 mikabat sa 313 ka mga biktima sa sex trafficking ang na-rescue sa mga otoridad dinhi sa Metro Cebu. Gikan sa Hunyo 2007 hangtud sa Marso 31, 2011 mikabat sa 97 ka mga tawo ang nasikop tungod sa kalapasan sa Akta Republika 9208 nganhi sa Metro Cebu ug sa maong buwan ug tuig mikabat sa 122 ang napasakaan og kaso sa maong kalapasan.

Sa Marso 31, 2011 mikabat sa 63 ka mga kaso sa kalapasan sa Akta Republika 9208 ang naduso ngadto sa korte ubos sa suporta sa IJM.

 Sa maong gidaghanon 30 sa dakbayan sa Sugbo, 13 sa dakbayan sa Mandaue, 17 sa Lapu-Lapu ug tulo ngadto sa ubang lugar.

Sa maong buwan gihapon mikabat sa 40 ang napahigayong operasyon sa kapolisan uban sa IJM diin 21 niini sa dakbayan sa Sugbo, pito sa Mandaue, 11 sa Lapu-Lapu ug usa sa laing lugar. (BANAT NEWS)