44 ka kahong binuthang isdang tuloy gisakmit

CEBU, Philippines -  Nasakmit sa hiniusang operasyon sa Bureau of Fisheries and Aquatic Resources (BFAR) ug Cebu Provincial Anti- Illegal Fishing Task Force inubanan sa 78th Infantry Battalion (IB) ug National Bureau of Investigation (NBI) ang 44 ka kahon nga isdang tamban (tuloy) nga nakuha sa dinamita mga alas-11 kagahapon sa buntag.

Gipahigayon ang operasyon human nakadawat ang Provincial Environment and Natural Resources Office (PENRO) og report gikan sa usa ka wala magpailang impormante pasado alas-8 sa buntag kagahapon.

Ang maong mga isda gikarga sa usa ka truck nga gikan sa Kawit, Medellin nga dad-on unta padulong sa Pasil Fish Market nababagan diha sa barangay Cotcot sa lungsod sa Liloan.

Sumala pa ni Elvie Flores, OIC sa Fisheries Resource Management Division sa BFAR kinsa maoy miabli sa ginhawaan sa maong mga isda positibo kining nakuha pinaagi sa dinamita.

Ang isdang nakuha pinaagi sa dinamita o tiklong mapusa ang ginhawaan sa ilawom. Kini usab ang hinungdan nga daling madubok o mabaho ang isdang nakuha pinaagi sa dinamita.

Nasuta usab nga walay auxiliary permit gikan sa lugar diin kini gikan nga diin mapatik ang pangalan sa nagdala ug sa tag-iya sa maong isda nga gibiyahe. Ang maong mga isda ug trak gikustodiya sa PENRO samtang ang mga isda gikatakdang ipang-apod-apod sa mga nagkadaiyang prisohan o mga balay-dangpanan sa lalawigan. (BANAT NEWS)