CEBU, Philippines - Duha na usab ka tawo ang naghikog ug usa kanila ang natabang sa mga kabanay ug nadala sa tambalanan. Kini na maoy ikalimang insidente sa paghikog nga nahitabo dinhi sa Sugbu sulod lang ning semanaha.
Usa ka 17-anyos nga lalaking molupyo sa sitio Bakay sa barangay Tulay sa lungsod sa Minglanilla ug tinun-an sa high school ang labing uwahing napuno sa talaan sa mga naghikog.
Matud pa sa kapolisan base sa ilang nakuhang impormasyon gibuwagan sa iyang uyab ang maong batan-on sa wala pa kini maghikog niadtong Huwebes sa alas 8:30 sa gabii.
Ang nagpakamatay nga tinun-an sa high school sa Tulay National High School matud ni PO2 Edsel Recablanca sa Minglanilla Police Station dihang nahinabi sa Banat News gibutyag sa inahan niini nga magul-anon na sukad nga nag-away sa iyang hinigugma nga misangpot sa panagbuwag.
Ang 13-anyos nga manghod sa batan-on maoy nakadiskubre sa patay’ng lawas niini nga nagbitay na sa extension nila sa balay nga adunay higot nga pisi ang liog ug ang pikas tumoy gibaat sa kisame ug wala nay panimuot, patay na kini pag-abot sa Minglanilla District Hospital.
Samtang sa miaging gabii (Huwebes), pabiling giatiman sa sulod sa Cebu City Medical Center (CCMC) ang usa ka drayber nga nag-unay og dunggab sa iyang kaugalingon miaging alas-10 sa gabii.
Ang nalandig sa tambalanan giilang si Gilbert Blanquero, 48, taga sitio Riverside sa barangay Punta Princesa siyudad sa Sugbu nakaangkon og samad dinunggaban sa tiyan.
Matud pa sa kapulisan nga katulo na ka higayon nga misuway sa pagpakamatay si Blanquero, una niadtong miaging buwan pinaagi sa pag-inom og pestisidyo, apan nasanta sa iyang igsuon.
Ang ikaduhang pagsuway sa pagpakamatay ni Blanquero nahitabo usa ka semana gikan sa una niining pagsuway og pagpakamatay apan naputol ang pisi nga iyang gihigot sa iyang liog paglukso niini.
Mitug-an ang igsuon niini nga dunay gihambing mga sakit ang igsuon nga nagkomplikar na.
Sayo niining semanaha usa ka teller sa bangko ang naghikog sa Argao ug nasundan kini sa duha nga naghikog sa dakbayan sa Sugbu.(EIM) (BANAT NEWS)