100 tanod gibansay sa pagresponde sa katalagman

CEBU, Philippines -  Kapin sa 100 ka barangay tanod ug mga representante gikan sa mga local government agencies ang misalmot sa usa ka semana nga disaster rescue and relief operations training sa Bantayan niadtong Lunes.

Ang mga sakop sa 7th Regional Community Defense Group (7RCDG) ug ang Office of Civil Defense maoy mipahigayon sa maong training sa municipal gym sa maong lungsod.

Ang maong programa gilusad niadtong Pebrero niining tuiga ug matud pa ni Col. Raymond Bañares Jr., Group commander sa 7RCDG nga ang lungsod sa Bantayan maoy labing unang Local Government Unit pinaagi ni Mayor Ian Christopher Escario nga misanong sa maong pagbansay-bansay.

Segun pa ni Escario   nga human sa maong training andam na karon ang ilang mga barangay tanod nga moresponde sa mga katalagman ug mihulagway nga mas maayong adunay pagpangandam aron masayod sila kung unsay buhaton.

Ang kapin sa 100 ka tanod lakip lamang sa 17,000 ka tanod nga ibansay-bansay isip reserved force nga moatubang sa mga umaabot nga kalamidad sa katilingban.

Si Gov. Gwendolyn Garcia maoy nangulo sa pagpirma sa declaration of commitment sa programa, siya usab ang kasamtangang battalion commander sa 1st Cebu Ready Reserve sa 701st Community Defense Center, Area Reserve Command, Philippine Army.

Ang maong training gipaabot nga mahuman sulod lang sa usa ka tuig nga motutok sa pagbansay alang sa disaster relief and rescue operations, fire prevention and suppression, kampanya batok ilegal nga drugas, ilegal nga pagpangisda ug kalinaw. (Maricor E. Arbol, CNU Intern/EIM)