Merkado sa Tabunok sunugon - vendors

CEBU, Philippines -  Mga vendors sa merkado publiko sa barangay Tabunok, dakbayan sa Talisay nakadawat og hulga nga sunugon ang maong merkado kung dili sila mobalhin sa bag-ong gitukod nga merkado publiko sa barangay Lagtang.

Sila si Helen Ocampo, Marivic Lasquite ug Annaliza Candilada, mga opisyal sa Tabunok Market Vendors mianha kagahapon sa buntag sa Talisay City Police Station ug mi-report kabahin sa maong mikatap nga hulga.

Base sa imbestigasyon ni SPO1 Elmer Saladas, duty desk officer sa TCPS nga mga alas 7:00 sa gabii niadtong Miyerkules ang mga vendors nagpahigayon og meeting diha sa balay ni Helen Kelly sa barangay Bulacao, Talisay dunay mitawag sa landline ni Kelly nga usa ka wala magpailang lalaki nga nagkanayon “nga naay tawong mosunog sa merkado sa Tabunok.”

Si Talisay City Administrator Richel Bacaltos sa pakighinabi sa Banat News kagahapon nagkanayon nga ang kagamhanan sa siyudad dili mobuhat og ingon nianang pamaagi nga manghulga.

Matud ni Bacaltos nga kahapsay ug kalinaw tali sa mga vendors ang gustong mahitabo sa siyudad ug gani gipamati nila ang tanan nilang mga yangungo sa ilang pagbalhin ngadto sa bag-ong merkado.

Giawhag niya ang tawong mihimo og pagpanghulga nga dili na mohimo og lain pang negatibong lakang tungod kay sa gibuhat niini nakadugang hinuon sa problema.

Giawhag usab ni Bacaltos ang mga vendors nga magmabugnawon lang tungod kay tanang mga problema dunay kasulbaran.

Kahinumduman nga ang mga vendors diha sa merkado sa Tabunok nagdumili sa pagbalhin ngadto sa bag-ong merkado sa barangay Lagtang tungod sa kabalakang langawon sila didto tungod sa katuyuon sa maong lugar.

Niadtong milabay’ng adlaw sa pagpakita sa ilang pagsupak mipahigayon sila og rally diha sa city hall ug mipadayag nga dako ang mamahimong kawad-on niini sa ilang panginabuhian kun ipamugos sa dakbayan ang pagpabalhin kanila. (EIM) (BANAT NEWS)