Ylanan gireklamo ni Joavan ug uyab nga mihasi nila

CEBU, Philippines -  Ang kontrobersiyal nga sinagop ni Mayor Socrates Fernandez nga si Joavan Fernandez ug ang uyab niini mipasangil nga gi-harass sa hepe sa Investigation and Detective Management Branch (IDMB) nga si Chief Inspector George Ylanan.

Niadtong Miyerkules sa gabii si Doreen Isidro, 20, taga barangay Carreta sa dakbayan sa Sugbo ug Joavan mipa-blotter diha sa Talisay City Police Station sa giingong pagpang-harass ni Ylanan.

Giingong niadtong higayona si Ylanan dunay kuyog nga laing lima ka mga polis. Si Isidro mipasangil kang Ylanan miadto sa iyang balay sa barangay Carreta ug ang lima ka mga polis ug gi-harass siya niini.

Matud niya nga si Ylanan mibuhi og mga pulong nga nagkanayon “asa si Joavan Fernandez? Unsay sakyanan gigamit?, asa ang direction padulong?, public scandal na inyong gibuhat kay sa dalan mo gabuhat nga panag-iya sa gobiyerno….Wala ka kabalo kun kinsa ang gobiyerno?, ako ang gobiyerno kay polis ko….Wa ka kaila nako kun kinsa ko? Ako si George Ylanan sa Cebu City…Kung gusto ka og lisod, lisud-lisuron pud ka namo.”

Tungod sa maong gibuhat ni Ylanan si Isidro gibati og kahadlok ug mikuyog kini kang Joavan sa TCPS ug nagpa-blotter nianang pagkagabii niadtong Miyerkules.

Si Joavan kinsa nagpa-blotter usab nagkanayon nga mga alas 8:00 sa gabii niadtong Miyerkules diha siya sa barangay Carreta aron ubanan ang iyang uyab.

Apan sa walay igong rason si Ylanan ug kaubang mga polis kinsa sakay og police patrol car migukod kaniya paingon ngadto sa barangay Bulacao, dakbayan sa Talisay.

Si Ylanan kinsa gikuhaan og pamahayag sa The Freeman ang igsuong pamantalaan sa Banat News sa iyang bahin nagkanayon nga ang maong pasangil ni Joavan ug Isidto tubagon niya ngadto sa saktong proseso.

“Di ko motubag, tubagon nako sila sa saktong proseso, di ko motubag og binugo nga estorya, if mo-comment ko ana kingkoy sad ko, sorry it’s not proper, awkward man gud sa akong part, I’m just following the law, motubag ko in proper forum,” ni Ylanan pa.

Kahinumduman nga si Joavan gialarma niadtong Martes sa gabii human may concerned citizen nga mitawag og polis tungod sa giingong pagkulata niini kang Isidro diha sa dalan ug pugsanong pagpasakay niini sa iyang sakyanan.

Si Isidro nianang gabhiuna dihang gipangutana nila ni Ylanan giingong nagdumili sa pagpasaka og reklamo kang Joavan. Si Ylanan sa iyang bahin kabahin gihapon nianang hitaboa mibutyag sa media nga ‘pribadong’ problema ang nahitabo tali sa managhinigugmaay maong dili sila makabuot sa desisyon ni Isidro. (BANAT NEWS)