RTWPB wala pa makadesisyon kun may umento sa suhulan

CEBU, Philippines -  Wala mahingpit ang pagpagawas og desisyon kabahin sa pagtino kung duna bay kapasikaran nga patas-an ang suhulan sa pamuo dinhi sa Central Visayas human duha ka mga representante sa Regional Tripartite Wage Productivity Board-7 wala motunga sa tigom kagahapon.

Ang mga pamuo midemanda og P100 nga usbaw sa suholan nganhi sa Central Visayas tungod sa nagpadayong pagsaka sa presyo sa palaliton.

Apan una pa mohimo og hearing kung usbawan ang suhulan, gituki una kagahapon sa board kun duna bay ‘supervening condition’ o duna bay rason o krisis nga nasinati nganhi sa Central Visayas.

Ang Associated Labor Union-Trade Union Congress of the Philippines (ALU-TUCP) mipetisyon og P100 nga usbaw sa suholan samtang P120 usab ang giduso sa Alliance of Progressive Labor (APL).

Sa nahimong botasyon kagahapon, tulo ka representante ang mibotar nga dunay supervening condition nga nasinati sa CV samtang duha ang miingon nga walay susama niining nahitabo.

Aron pagbuak sa tabla nga botasyon si Department of Labor regional director Exequiel Sarcauga mibotar sa pabor. Apan tungod sa patakarang “three plus one” una pa mahingpit nga balido ang botasyon sa board wala pay kasigurohan ang resulta niini sanglit absent ang duha ka representante.

Nunot niini nagkinahanglan pang mangayo og legal opinion ang board ngadto sa National Wages Productivity Commission (NWPC).

Base sa balaod walay mahitabong usbaw sa suhulan kung di pa maabtan og usa ka tuig, ang labing uwahing wage increase sa CV gipatuman niadtong bulan sa Agosto.

Apan sa interbyu sa ABS-CBN Central Visayas kang Atty. Ernesto Carreon, chief legal council sa ALU-TUCP ug maoy labor representative sa board kagahapon nagkanayon nga adunay exemption ang usa ka tuig nga ban sa wage increase.

Kini kung adunay supervening condition nga nasinati ang usa ka lugar susama sa nasinati karong panahona. Ang presyo sa lana nagpadayon sa pagsaka ug nakaapektar na sa presyo sa batakang palaliton sa publiko apan gamay ang suhulan sa pamuo. (BANAT NEWS)