7-anyos nadasmagan, patay

CEBU, Philippines - Patay ang 7-anyos nga batang lalaki dihang nadasmagan og sakyanan dihang kalit lamang kining milabang sa dalan Plaridel sa barangay Paknaan sa dakbayan sa Mandaue alas-11 pasado ang takna sa buntag niadtong miaging adlaw.

Ang namatay giila nga mao si Ronieville John Alinsug, nagpuyo sa Zone Camanse sa nahisgutang barangay ug ang nakadasmag mao ang Fuso Canter nga nagdala sa plate number CSB 852 nga gimaneho ni Julie Rochelle Humpisao Igdima, 26, taga Lower Tipolo sa dakbayan sa Mandaue.

Si SPO4 Vicente Benabaye, imbestigador sa traffic division sa Mandaue City Police Office (MCPO) nga nahinabi sa Banat News miingon nga kusog nga nagdagan paingon sa lungsod sa Consolacion ang maong trak dihang kalit nga milabang ang bata ug napunggit.

Ang bata nalagpot ug nakaangkon og grabeng kadaot sa kalawasan ug gidala sa Cebu Institute of Medicine nga nahimutang usab sa maong lugar ug human sa pasiunang pagtambal dali kining gihatod sa Vicente Sotto Memorial Medical Center sa dakbayan sa Sugbo apan pipila ka takna nga nakalabay sa pag-atiman sa mga doktor namatay kini.

Si Benabaye miingon nga si Igdima mitahan dayon human sa hitabo ug gipasakaan og kasong Reckless Imprudence Resulting to Homicide. (BANAT NEWS)