CEBU, Philippines - Usa ka dalaga ang mi-akusar sa duha ka polis sa lungsod sa Argao nga siya gimolestiya karung tuiga ug sa miaging tuig.
Si Chel (ngalan gipugngan) nagpangidaron og 18-anyos ug nagpuyo sa lungsod sa Argao ang mi-akusar sa duha ka polis sa maong lungsod nga nag-ranggo og Senior Police Officer 1(SPO1) ug Police Officer 2 (PO2) kansang mga pangalan gipugngan hangtud walay pormal nga kiha batok kanila.
Sa pakighinabi sa Banat News ni Chel, mipasangil kini nga niadtong milabay’ng tuig nahitabo ang unang higayon nga siya gi-molestiya sa usa ka polis sa maong presinto.
Kini dihang gisugo siya niini (nagranggo og SPO1) nga pakuhaon og init tubig sa polis sulod sa presinto kay magkutaw kini og kapeng gipalit gikan sa ilang tindahan.
“Gisugo ko niya og pakuha og tasa sudlan sa init tubig, pagbalik nako nakuratan ko kay misulod man siya unya kalit lang nga gisirad-an ang pultahan dapit sa ilang kan-anan. Kalit lang ko niya nga gihalog unya mohalok na siya sa akong liog padulong mao to nga ako siyang gitulod unya natumba,” matud pa ni Chel.
Human sa maong panghitabo, daling miadto sa ilang panimalay si Chel apan sa kahadlok wala na niya kini itug-an sa mga kabanay.
Karung buwan sa Abril lamang, lain na usab nga polis sa mao gihapong police station ang giingong misuway og panghilabot sa dalaga ug kini nanguyab pa kaniya bisan minyo na ang maong polis.
Matud pa ni Chel nga alas-2 sa kaadlawon sa Abril 18 ning tuiga samtang siya natulog daplin sa bintana sa ilang balay kalit siyang nakamata sa pagpamukaw sa nagranggo og PO2 nga nanguyab kaniya kay buot kining mosulod.
Dali niya kining gibaharan nga mosiyagit siya kung mamugos kini pagsulod hinungdan nga milakaw ang maong polis. Apan nakurat siya dihang nianang Abril 23 sa kaadlawon nakamata na usab si Chel dihang may kamot nga gipalusot sa bintana tupad sa iyang gihigdaan nga nagpunay og kumot sa iyang dughan.
Ang biktima nagkanayon nga tungod sa nahitabo kaniya buot unta niyang mopasaka og pormal nga reklamo apan wala niya kini ihinayon dihang ang iyang igsuon mitug-an nga gihatagan kini og P4 mil sa polis nga nagranggo og SPO1 sa walay igong rason.
Midugang usab si Chel nga niadtong Abril 30, usa sa mga opisyal sa maong police station pagkasayod sa gibuhat sa iyang mga sakop miapil sa paghangyo kaniyang di nalang ihinayon ang kaso.
Sa samang adlaw gikatahong gitunolan siya og P10 mil nga gitunol usab niya sa iyang maguwang ug nianang pagkahapon gipatawag siya sa buhatan sa maong opisyal aron papirmahon og kasabutan nga dili na kini mokiha ug midawat kini sa maong salapi.
Ang amahan ni Chel pagkasayod niadtong Mayo 3 di makadawat sa nahitabo ug midangop sa barangay.
Ang maong opisyal dihang gikuhaan og habig sa Banat News kusganong mihimakak sa pasangil ug nangangkong iyahang gisultihan ang biktima nga aduna kini katungod sa pagkiha o ipaagi nalang sa sabot-sabot.
Ang duha ka polis nga giakusahan nga gikahinabi sa Banat News kusganon usab nga mihimakak sa malaw-ay nga buhat nga gipasangil batok kanila.
Apan ang usa miangkong mihatag kini og kwarta sa babaye agi og tabang kay na-hospital man kini (biktima).
Si Sr. Supt. Patrocinio Comendador ang director sa CPPO mibutyag nga paabuton niya ang resulta sa imbestigasyon sa Argao police station chief. (BANAT NEWS)